توانائی قیمتوں کامتفقہ حل تلاش کرنا ہوگا:زرداری
اسلام آباد(سٹاف رپورٹر)صدر مملکت آصف علی زرداری سے ڈاکٹر گوہر اعجاز کی قیادت میں فیڈریشن آف پاکستان چیمبرز آف کامرس اینڈ انڈسٹری کے وفد نے ملاقات کی ،ملاقات میں تاجروں اور 40 علاقائی کاروباری تنظیموں کے عہدیداروں نے شرکت کی ۔
صدر مملکت نے کہا کہ توانائی کی بڑھتی قیمتوں سے نمٹنے کیلئے سب کیلئے سودمند حل تلاش کرنا ہوگا، کپیسٹی چارجز کے مسئلے کا قابلِ عمل حل تیار کرنے کیلئے کاروباری برادری ایک کمیٹی تشکیل دے ،کمیٹی شعبہ ِ توانائی کے مسائل کے حل کیلئے صدر مملکت کے دفتر کے ساتھ مل کر کام کرے ،صدر مملکت کا دفتر کاروباری برادری کی کمیٹی کے ساتھ ہر ممکن تعاون کرے گا ،حکومت، عوام، تاجر برادری ، پیداواری کمپنیوں سمیت سب کیلئے سودمند حل تلاش کیا جانا چاہیے ، متفقہ حل تیار کیا جائے تاکہ کسی سٹیک ہولڈرز کو نقصان نہ ہو،پاکستان کے کاروباری اداروں کو درپیش مسائل سے آگاہ ہوں، صدر نے کہا کہ ادراک ہے کہ مہنگے خام مال ، توانائی اور ایندھن کی وجہ سے کاروباری شعبے کو مشکلات کا سامنا ہے ۔ گوہر اعجاز نے صدر کو اپنے مسائل بارے آگاہ کیا ،صدر نے وفد کو مسائل کے حل کے لئے متعلقہ حلقوں کے سامنے معاملہ اٹھانے میں تعاون ہر ممکن ریلیف کا بھی یقین دلایا۔
