وی پی این رجسٹریشن کیلئے 30نومبرکی مہلت
اسلام آباد (مانیٹرنگ ڈیسک)پاکستان ٹیلی کمیونیکیشن اتھارٹی (پی ٹی اے )نے غیر رجسٹرڈ وی پی اینز کی رجسٹریشن کیلئے مزید 2ہفتے (30نومبرتک )کی مہلت دینے کا فیصلہ کرلیا۔۔۔
یکم دسمبر سے غیر رجسٹرڈ وی پی اینز کے خلاف کریک ڈاؤن شروع کیا جائے گا۔ پی ٹی اے ذرائع کے مطابق ورچوئل پرائیویٹ نیٹ ورک کی بندش کے حوالے سے ایک ٹرائل کامیابی سے مکمل کرلیا گیا جبکہ دوسرا ٹرائل آئندہ دنوں میں کیا جائے گا۔پی ٹی اے کا مؤقف ہے کہ غیر رجسٹرڈ وی پی این سکیورٹی رسک ہیں جس سے حساس ڈیٹا تک رسائی حاصل کی جاسکتی ہے ۔اس سے قبل سینیٹ کی قائمہ کمیٹی کو بریفنگ دیتے ہوئے چیئرمین پی ٹی اے حفیظ الرحمن نے کہا کہ پاکستان میں وی پی این ابھی چل رہا ہے بند نہیں ہوا، وی پی این کے بغیر آئی ٹی انڈسٹری نہیں چل سکتی کیونکہ عام آدمی، فری لانسرز اور کمپنیوں کو وی پی این کی ضرورت ہوتی ہے ۔انہوں نے کہا کہ 2016 میں وی پی این رجسٹریشن کی پالیسی بنی تھی، ہم نے وی پی این کی ابھی دوبارہ رجسٹریشن شروع کی ہے اور اب تک 25 ہزار وی پی این کی رجسٹریشن کر چکے ہیں۔چیئرمین پی ٹی آئی نے بتایا کہ پی ٹی اے نے 5 لاکھ غیر اخلاقی سائٹس بلاک کیں، پچھلے اتوار 2 کروڑ پاکستانیوں نے غیر اخلاقی سائٹس تک رسائی کی کوشش کی۔