مانانوالہ،قصور:ٹریفک حادثات،بچے سمیت 2 جاں بحق
مانانوالہ،قصور(نمائندگان دنیا) مانانوالہ اور قصور میں ٹریفک حادثات کے دوران بچے سمیت 2 جاں بحق جبکہ 4 افراد شدید زخمی ہو گئے ۔
تفصیل کے مطابق گزشتہ روز مانانوالہ لاگر روڈ پر ریس کے دوران ایک ٹریکٹر ٹرالی کی سائیڈ لگنے سے دوسری سیم نالے میں جا گری ،ریسکیو 1122 ٹیموں نے 5گھنٹے بعد دبے ہوئے دونوں افراد کو نکالا تو ڈرائیور 27 سالہ واجد جاں بحق ہو چکا تھا جبکہ 30 سالہ شہباز شدید زخمی ہو گیا۔ لنک مانانوالہ جی ٹی روڈ پر تیز رفتار موٹرسائیکل رکشہ الٹنے سے 2طالب علموں سمیت 3 افراد نادیہ،عمر اور حسنین زخمی ہو گئے ۔ قصور کے علاقے بھٹہ نمبر 22گھنیکے کا رہائشی ،پانچویں جماعت کا طالبعلم محمدعثمان گورنمنٹ ایلیمنٹری سکول سے دوستوں کے ساتھ پیدل بھٹہ پر آرہا تھا کہ راستے میں لوڈر رکشہ پر چڑھنے لگا اور گر گیا ،رکشہ کے ٹائروں کے نیچے آکر شدید زخمی ہوگیا،ٹی ایچ کیو ہسپتال کوٹ رادھاکشن لے جایا گیا مگر زخموں کی تاب نہ لا سکا۔
