واوڈا ہمیشہ ہیڈ لائن میں رہتے ، مزا لینا ہے تو انہیں سنیں،گورنر
کراچی (خبر ایجنسیاں) گورنر سندھ کامران خان ٹیسوری نے کہا ہے کہ اگر آپ کو مزا لینا ہے تو فیصل واوڈا کو سنیں۔کراچی ایکسپو سینٹر میں منعقدہ کتب میلے میں میڈیا سے گفتگو کرتے ہوئے انہوں نے مزید کہا کہ فیصل واوڈا ہمیشہ ہیڈ لائن میں رہتے ہیں۔
میں ذاتی طور پر ان کے پروگرام دیکھتا ہوں۔انہوں نے کہا کہ ہم بھی دیکھیں گے ایک ہفتے میں کون کہاں جا رہا ہے ۔ادھر انویسٹ ایکسپو کی تقریب سے خطاب کرتے ہوئے گورنر سندھ کامران ٹیسوری کا کہنا تھا کہ پاکستان کا معاشی نظام چند ہاتھوں میں ہے ، معیشت بہتر کرنے کے لیے سب کو کھڑا ہونا ہوگا،اسٹاک مارکیٹ کے بارے میں عام لوگوں کو کم معلومات ہیں، لوگ سمجھتے ہیں اسٹاک مارکیٹ میں پیسے ڈوب جائیں گے ،مستقبل میں پاکستان مرکنٹائل ایکسچینج کا بہت اہم کردار ہے اور ہوگا۔ کامران ٹیسوری نے کہا کہ ملک کا معاشی نظام مضبوط کرنے کی ضرورت ہے ، اسٹاک ایکسچینج میں 3 ملین لوگوں کے اکاؤنٹ ہونے چاہئیں۔ گورنر سندھ نے کہا کہ گولڈ ٹریڈنگ پر اب یہاں خصوصی توجہ دینے جارہے ہیں، 300 روپے میں ہم پاکستان مرکنٹائل ایکسچینج میں اکاؤنٹ کھول سکتے ہیں، مرکنٹائل ایکسچینج میں بچوں کے لئے لائف ٹائم سیونگز سرمایہ کاری ہے ۔ انہوں نے کہا کہ بلیک مارکیٹ میں جو گولڈ اس وقت ہے وہ اس مارکیٹ میں آجائے گا، اس وقت ملک میں 4 ہزار ٹن سونا موجود ہے جو معیشت میں آگیا تو معیشت میں بہت بہتری آئے گی، مرکنٹائل ایکسچینج میں گلوبل ٹریڈنگ پلیٹ فارم بنانے جارہے ہیں۔ کامران ٹیسوری نے کہا کہ پاکستان سے گلوبلی کموڈٹیز ایکسپورٹ ہوسکے گی۔
