نواز شریف کے پوتے زید حسین کی دعوت ولیمہ آج جاتی امرا میں ہوگی
لاہور(نیوز ایجنسیاں)سابق وزیراعظم و پاکستان مسلم لیگ(ن) کے صدر نواز شریف کے پوتے اورحسین نواز کے صاحبزادے زید حسین نواز کی دعوت ولیمہ کی تقریب آج اتوارکو جاتی امراء میں ہوگی۔
بارات میں قریبی رشتے دار اور غیر ملکی مہمانوں سمیت سیاسی شخصیات شریک ہوئیں ، بارات کی تقریب میں 500 اور ولیمے میں 700 افراد کو مدعو کیا گیا ہے ۔قبل ازیں نکاح اور رسم حنا کی تقریب جاتی امرا میں منعقد کی گئی تھی ، زید حسین نواز کی شادی کی تقریبات کے سلسلے میں جاتی امرا کو برقی قمقموں سے روشن کیا گیا ہے ، شادی کی تقریبات میں امریکا، برطانیہ، سعودی عرب، قطر، عرب امارات اور بھارت سے مہمان شریک ہو رہے ہیں،شادی میں شرکت کیلئے حسین نواز، ان کی فیملی اور ان کی بہن اسما ڈار بھی موجود ہیں جبکہ مہمانوں کی سکیورٹی کا انتظام پنجاب پولیس کر رہی ہے ، تقاریب کے دوران جاتی امرا جانے والی سڑک کے اطراف درختوں کو لائٹیں لگا کر نمایاں کیا گیا ہے اور جگہ جگہ پھولوں کے گملے رکھ کر علاقے کو سجا دیا گیا ہے ۔
