ہم نے سی پیک کی بنیاد رکھی کامیاب بنائیں گے : زرداری
لاہور(نیوزایجنسیاں)صدر مملکت آصف علی زرداری نے کہا ہے کہ عوام کی مشکلات میں کمی آ رہی ہے اور معاشی اشارئیے بہتری کی طرف گامزن ہیں،میرا چین کا دورہ کامیاب رہا ہے ،ہم نے سی پیک کی بنیاد رکھی اور اسے کامیاب بنائیں گے۔
انہوں نے سابق گورنر پنجاب مخدوم احمد محمود کی جانب سے اپنے اعزاز میں دیئے گئے عشائیے میں شرکت کے موقع پر گفتگو کرتے ہوئے ملک کی موجودہ اقتصادی صورتحال اور حکومت کی جانب سے کی جانے والی مختلف اصلاحات پر روشنی ڈالی اور انتظامیہ کی کارکردگی میں مزید بہتری لانے پر زور دیا۔ صدر مملکت نے اپنے حالیہ دورہ چین بارے گفتگو کرتے ہوئے کہا کہ میرا چین کا دورہ کامیاب رہا ہے، چین اور پاکستان خطے کی ترقی کیلئے مشترکہ اقدامات کر رہے ہیں اور چینی کمپنیاں پاکستان میں فیکٹریاں لگائیں گی۔سندھ حکومت نے صحت اور تعلیم کے شعبے میں نمایاں کام کیا ہے ،سندھ میں نئی یونیورسٹیاں، کالجز اور ہسپتال بنائے گئے ہیں، سندھ حکومت نے سیلاب زدگان کیلئے گھر بنائے ہیں اور دیگر صوبوں کو بھی اس کی تقلید کرنی چاہئے۔
