کوئٹہ :ٹرین سروس تاحال معطل ،2دن سے نیٹ بھی بند
کوئٹہ(آئی این پی )بلوچستان میں جعفر ایکسپریس پر حملے کے بعد سے کوئٹہ سے ٹرین سروس تاحال معطل ہے جب کہ انٹرنیٹ سروسز کی معطلی بھی دوسرے دن میں داخل ہوگئی ۔
تفصیلات کے مطابق کوئٹہ سے 10 روز گزرنے کے باوجود ٹرین سروس بحال نہ ہو سکی۔ سانحہ جعفر ایکسپریس کے بعد سے کوئٹہ ریلوے سٹیشن بند ہے ، جس کی وجہ سے مسافروں کو شدید پریشانی کا سامنا ہے ۔ خاص طور پر عید الفطر کے موقع پر دیگر شہروں کو جانے والے افراد سخت مشکلات کا سامنا کررہے ہیں۔ریلوے حکام کا کہنا ہے کہ سکیورٹی کلیئرنس ملنے کے بعد ہی کوئٹہ سے ٹرین سروس بحال کی جائے گی۔دوسری جانب کوئٹہ شہر میں موبائل فون انٹرنیٹ سروس دوسرے روز بھی معطل رہی ۔ اطلاعات کے مطابق شہر میں موبائل انٹرنیٹ سروس 2 بجے کے بعد معطل کی گئی، جس کی وجہ سے لوگوں کو شدید پریشانی اور مشکلات کا سامنا کرنا پڑ رہا ہے ۔ سرکاری حکام کی جانب سے انٹرنیٹ سروس کی معطلی کی وجہ نہیں بتائی گئی۔
