ایساپنجاب چاہتے ہیں جہاں کسی کو پیدائشی فرق پرکمتر نہ سمجھاجائے :مریم نواز
لاہور (نیوزایجنسیاں ) وزیراعلیٰ پنجاب مریم نوازشریف نے کہاہے کہ ایسا پنجاب چاہتے ہیں جہاں کسی کو جلد،ظاہری شکل یا پیدائشی فرق کی بنیاد پر کمتر نہ سمجھا جائے ، البینزم سے متعلق آگاہی کے عالمی دن (International Albinism Awareness Day) پر اپنے پیغام میں انہوں نے کہا کہ البینزم کمزوری نہیں،محض قدرتی تنوع کا حصہ ہے ۔
البینزم کا شکار افراد خوبصورتی کا روشن پہلو ہیں عزت اور تحفظ دینا معاشرتی فریضہ ہے ۔ ایسا پنجاب چاہتے ہیں جہاں کسی کو جلد،ظاہری شکل یا پیدائشی فرق کی بنیاد پر کمتر نہ سمجھا جائے ۔البینزم سے متاثرہ افراد کے لیے محبت، احترام اور قبولیت کا دائرہ کار مزید وسیع کرنا ہوگا۔ حکومت پنجاب البینزم سمیت دیگر سپیشل افراد کو مکمل تعلیمی، طبی سہولیات کی فراہمی کیلئے سرگرم عمل ہے ۔ البینزم کے شکار افراد کے حقوق کی حفاظت اور امتیازی سلوک کے خاتمے کے لیے متحد ہو کر آواز بلند کرنا ضروری ہے ۔دوسری طرف انہوں نے ایران پر اسرائیلی حملے کی مذمت کرتے ہوئے ایرانی عہدیداروں کی شہادت پر افسوس اور عوام سے ہمدردی کا اظہار کرتے ہوئے کہا کہ ایران پر اسرائیلی جارحیت سے عالمی امن کو شدید خطرہ لاحق ہوچکا ہے ۔دریں اثنا وزیراعلیٰ نے چکوال کے قریب کار حادثے میں قیمتی انسانی جانوں کے ضیاع پر افسوس کا اظہار کرتے ہوئے سوگوار خاندان سے ہمدردی و تعزیت کا اظہار کیا۔
