پاکستان کو فیٹف گرے لسٹ میں شامل کرانے کی بھارتی کوشش ناکام
اسلام آباد (دنیا نیوز)بھارت کو فنانشل ایکشن ٹاسک فورس(فیٹف)کی گرے لسٹ میں پاکستان کو شامل کرانے میں ناکامی کا سامنا کرنا پڑا ہے ۔ذرائع کے مطابق بھارت کے سفارتی وفد کی جانب سے پاکستان کو گرے لسٹ میں شامل کرنے کی بھرپورکوشش کی گئی تاہم پاکستان کو گرے لسٹ میں رکھنے کے بجائے رپورٹنگ پر رکھنے کا فیصلہ کیا گیا ۔
چین نے گزشتہ روز فیٹف اجلاس میں پاکستان کے حق میں واضح مؤقف اختیار کیا اور ریلیف کی حمایت کی، ترکیہ اور چاپان کی جانب سے بھی پاکستان کی مکمل حمایت کی گئی،بھارت اپنے مقاصد حاصل کرنے میں مکمل طور پر ناکام رہا۔ذرائع کے مطابق آپریشن بنیان مرصوص کے بعد بھارت نے پاکستان کو سفارتی سطح پر تنہا کرنے کیلئے بھرپور کوششیں کیں، پاکستان کیخلاف پروپیگنڈا کیلئے بھارتی خفیہ ایجنسی ’’را‘‘ پیش پیش رہی جس نے پاکستان کو بدنام کرنے کیلئے نئی دہلی میں ایک ڈس انفو لیب بھی قائم کی، اس کا مقصد پاکستان کے حوالے سے دنیا کو گمراہ کرنا ہے ، اس ڈس انفو لیب کے ذریعے پاکستان کے خلاف جھوٹا اور من گھڑت پروپیگنڈا کیا جاتا ہے ۔ذرائع کا کہنا ہے کہ بھارتی حکومت کے سفارتی وفود مختلف ممالک میں گئے اور ہر جگہ پاکستان کے خلاف زہر افشانی کی ، کسی بھی ملک نے بھارت کے سفارتی وفد کے بیانیے کو پذیرائی نہیں دی۔بھارت اسرائیل کی مدد سے ایف اے ٹی ایف کو پاکستان کے خلاف استعمال کرنے کی بھرپور کوشش کر رہا تھا، تاہم ایف اے ٹی ایف کے رکن ممالک نے بھارت کے منفی پروپیگنڈے کو نظر انداز کیا۔بھارت کی تمام تر سازشوں کے باوجود پاکستان کو گرے لسٹ میں شامل نہ کرنا بڑی کامیابی ہے ، آپریشن بنیان مرصوص کے بعد پاکستان کی سفارتی پوزیشن مسلسل مضبوط ہو رہی ہے ۔
