سرکاری افسروں کے اثاثے پبلک کرنے کا نوٹیفکیشن جاری
اسلام آباد (مانیٹرنگ ڈیسک)وفاقی حکومت نے انٹرنیشنل مانیٹرنگ فنڈ(آئی ایم ایف)کی ایک اور بڑی شرط پوری کر دی، اب گریڈ 17 اور اس سے اوپر کے سرکاری افسروں کے اثاثے پبلک ہوں گے ،صدر مملکت آصف علی زرداری کی منظوری سے سول سرونٹس ترمیمی ایکٹ 2025 کا گزٹ نوٹی فکیشن جاری کر دیا گیا۔
اسٹیبلشمنٹ ڈویژن نے گزٹ نوٹی فکیشن تمام وفاقی وزارتوں اور ڈویژنز کو بھجوا دیا۔نوٹیفکیشن کے مطابق سول سرونٹس ایکٹ 1973 میں سیکشن 15 کے بعد 15(اے )کا اضافہ کر دیا گیا۔نوٹی فکیشن میں کہا گیا ہے کہ سرکاری افسروں کے اثاثوں کی تفصیلات فیڈرل بورڈ آف ریونیو کے ذریعے پبلک کی جائیں گی، سرکاری افسروں کو اپنے اہل خانہ کے اثاثوں کی تفصیلات بھی جمع کرانا ہوں گی۔سرکاری افسر ملکی اور غیر ملکی اثاثوں اور مالی حیثیت سے آگاہ کریں گے ، سرکاری افسروں کو اپنے او راپنے اہل خانہ کے اثاثے ڈیجیٹل طور پر فائل کرنا ہوں گے ، کسی بھی افسرکی ذاتی معلومات کی راز داری کاخیال رکھا جائے گا۔
