پی ٹی سی ایل کے سابق ملازمین پنشن کے حق دار:سپریم کورٹ
اسلام آباد(کورٹ رپورٹر)سپریم کورٹ نے پی ٹی سی ایل کے سابق ملازمین کے پنشن کیس پر فیصلہ سنا دیا، تین رکنی بینچ نے 200 سے زائد اپیلوں پر تفصیلی فیصلہ جاری کرتے ہوئے سابق ملازمین کو پنشن کا حقدار قرار دے دیا۔
چیف جسٹس یحیی آفریدی اور جسٹس امین الدین خان نے پی ٹی سی ایل پنشنرز کے حق میں فیصلہ دیا جبکہ جسٹس عائشہ ملک نے اختلافی نوٹ لکھا۔عدالت نے اپنے فیصلے میں پی ٹی سی ایل کے سابق ملازمین کو پنشن کا مکمل حقدار قرار دیتے ہوئے کہا کہ ادارے کو مالی مسائل پنشن کی ادائیگی سے بری الذمہ نہیں کرتے ،سپریم کورٹ نے حکم دیا کہ پی ٹی سی ایل 90 دن کے اندر پنشن کی ادائیگی کا شیڈول مرتب کرے ، پنشن پر نظرِثانی وفاقی حکومت کی پالیسی کے مطابق کی جائے ۔عدالتی فیصلے کے مطابق وی ایس ایس (رضاکارانہ ریٹائرمنٹ سکیم) لینے والے ملازمین پنشن کے حق دار نہیں ہوں گے ، عدالت نے حکم دیا کہ ادائیگیوں کا عمل شفاف، منصفانہ اور موثر ہو تاکہ برسوں سے درپیش مطالبات کا ازالہ کیا جا سکے ۔
