آپریشن، نقل مکانی قبول نہیں : وزیراعلیٰ ہائوس پشاور میں جرگہ
پشاور(مانیٹرنگ ڈیسک)وزیراعلٰی ہائوس پشاور میں ضم قبائلی اضلاع باجوڑ اور مہمند کے عمائدین اور عوامی نمائندوں پر مشتمل قبائلی جرگہ ہوا۔ جرگہ عمائدین نے کہا کہ ہم امن چاہتے ہیں۔
حکومت ہمیں امن دے، ہم ہر قسم کے تعاون کے لیے تیار ہیں۔ دوسرا مشاورتی جرگہ وزیراعلٰی ہاوس میں منعقد ہوا۔جرگے میں ضلع باجوڑ اور مہمند کے عمائدین اور منتخب عوامی نمائندوں نے کثیر تعداد میں شرکت کی۔وزیراعلیٰ کے مشیر بیرسٹر محمد علی سیف، نور الحق قادری،چیف سیکرٹری اور آئی جی پی کے علاوہ متعلقہ کمشنرز،ڈپٹی کمشنرز اور پولیس حکام نے بھی جرگے میں شرکت کی۔جرگہ عمائدین نے کہا کہ مہمند اور باجوڑ میں آپریشن اور نقل مکانی قابل قبول نہیں ۔دہشت گردی کے مستقل خاتمے کے لیے وفاقی،صوبائی حکومتوں،قبائلی عمائدین سمیت تمام سٹیک ہولڈرز پر مشتمل وسیع البنیاد اور بااختیار جرگہ تشکیل دیا جائے جو افغان حکومت اور عوام سے بامقصد مذاکرات کرے ۔ شرکا نے مقامی جرگوں کی کارروائی کو سراہا اورکہا کہ اسے مزید با مقصد بنایا جائے تاکہ اِس کا اچھا نتیجہ دوسرے علاقوں کے لئے بھی مفید ثابت ہو۔ دہشت گردی کے خلاف سب متحد ہیں، دہشت گرد سب کے دشمن ہیں۔
