سال کا پہلا سپر مون 7 اکتوبر کو پاکستان سمیت دنیا بھر میں نظر آئیگا
اسلام آباد،کراچی (آن لائن،این این آئی) ماہرین فلکیات کے مطابق اکتوبر کا مہینہ آسمانی نظاروں کے شوقین افراد کیلئے خاص ہوگا کیونکہ رواں سال کا پہلا پورا چاند جسے سپر مون بھی کہا جاتا ہے 7 اکتوبر کو پاکستان سمیت دنیا بھر میں دکھائی دے گا۔
پاکستان سپیس اینڈ اپر ایٹموسفیئر ریسرچ کمیشن (سپارکو)کے مطابق سال کا پہلا سپر مون 7 اکتوبر بروز منگل کو نظر آئے گا جبکہ رواں سال مزید دو سپر مون 5 نومبر اور 5 دسمبر کو بھی دکھائی دیں گے ۔سپارکو حکام کا کہنا ہے کہ 7 اکتوبر کا سپر مون اوسط پورے چاند سے تقریباً 14 فیصد بڑا اور 30 فیصد زیادہ روشن نظر آئے گا اس رات، چاند زمین سے تقریباً 224,599 میل (361,400 کلومیٹر)کی دوری پر ہوگا۔اوسطاً ہر سال 3 سے 4 سپر مون نمودار ہوتے ہیں، تاہم اس سے قبل آخری سُپر مون 11 ماہ قبل نومبر 2024 میں دیکھا گیا تھا۔
روزنامہ دنیا ایپ انسٹال کریں
