تشدد شرمناک ،ظلم تھک گیا، مزاحمت نہیں تھکی، جنید اکبر
ناصر عباس پر پولیس نے وحشیانہ یلغار کی، کارکنوں پر کیمیکل زدہ پانی پھینکا گیا
لاہور(مانیٹرنگ ڈیسک) پی ٹی آئی کے رہنماجنید اکبرخان نے کہا ہے اڈیالہ جیل کے باہر جبر و استبداد کی ایک اور سیاہ رات رقم کی گئی۔ نہتے بچے ، بزرگ اور خواتین کارکنان پر ایسے اوچھے ہتھکنڈے استعمال کرنا انتہائی شرمناک عمل ہے ۔اپنے ایکس بیان میں انہوں نے کہا فسطائیت نے تمام حدیں توڑ ڈالیں، ہمشیرگان قائد عمران خان اور علامہ ناصر عباس پر پولیس نے وحشیانہ یلغار کی، کارکنان پر کیمیکل زدہ پانی پھینکا گیا، لاٹھیاں سروں پر ماری اور بے جا گرفتاریاں کی گئیں ۔ جبر کے ہر وار کے مقابل کارکنوں کا حوصلہ اور بھی مضبوط ہو کر ابھرا۔ ظلم تھک گیا، مگر مزاحمت نہیں تھکی۔وزیراعلیٰ خیبرپختونخوا کے معاون خصوصی برائے اطلاعات و تعلقات عامہ شفیع جان نے اڈیالہ جیل کے باہر بانی پی ٹی آئی کی بہنوں اور پارٹی کارکنوں پر کیمیکل ملا واٹر کینن کے استعمال کی مذمت کرتے ہوئے اسے جبر کی بدترین مثال قرار دیا ہے ۔اپنے بیان میں شفیع جان کا کہنا تھا کہ نہتی خواتین اور پرامن سیاسی کارکنان پر کیمیکل ملا واٹر کینن کا استعمال انتہائی تشویشناک ہے ۔
