اسحاق ڈار کا عرا قی ہم منصب کو فون ،روابط بڑھانے کاعزم
نائب وزیر اعظم کی زیر صدارت پاک ایران تعلقات پر اجلاس ،دوطرفہ تعان کا جائزہ
اسلا م آباد (وقائع نگار ) نائب وزیراعظم ووز یرِ خارجہ اسحاق ڈار نے عراق کے نائب وزیراعظم اور وزیرِ خارجہ ڈاکٹر فواد محمد حسین سے ٹیلی فون پر گفتگو کی، ترجمان دفترخارجہ کے مطابق دونوں رہنماؤں نے پاکستان اور عراق کے برادرانہ تعلقات کی توثیق کی اور دوطرفہ تعاون کو مزید مضبوط بنانے پر تبادلہ خیال کیا۔ دونوں رہنماؤں نے سیاسی اور اقتصادی شعبوں میں تعاون کے فروغ کے ساتھ ساتھ عوامی سطح پر روابط کو مستحکم کرنے کے عزم کا بھی اعادہ کیا۔ دریں اثنا سینیٹر محمد اسحاق ڈارنے پاکستان ایران تعلقات پر ایک بین الوزارتی اجلاس کی صدارت کی۔ نائب وزیراعظم نے ایران کے ساتھ ترجیحی شعبوں میں دوطرفہ روابط بڑھانے کے لیے پاکستان کے عزم کا اعادہ کیا۔اجلاس میں وزیر پٹرولیم ،وزیر اعظم کے مشیر خاص طارق باجوہ، سیکرٹری پٹرولیم ، وزارت خارجہ اور دیگر متعلقہ وزارتوں کے اعلیٰ حکام نے شرکت کی۔ نائب وزیراعظم نے سیکرٹری خارجہ اور وزارت خارجہ کے سینئر افسران کے ساتھ حالیہ سفارتی مصروفیات اور آئندہ خارجہ پالیسی کے اقدامات کا جائزہ لیا اور پاکستان کے سٹرٹیجک اور اقتصادی مفادات کو آگے بڑھانے کے لیے اہم نتائج پر بروقت فالو اپ اور بہتر تعاون کی ہدایت کی۔
