پنجاب بھرکے سکولوں سے نان سیلری فنڈزکی تفصیلات طلب
غلط اعدادوشمارفراہم کرنیوالے سکول ہیڈز اور اے ای اوز کے خلاف کارروائی کی جائیگی نان سیلری بجٹ مستحق بچوں کی کتابوں، کاپیوں اور وردیوں پر خرچ کیاجاتاہے :ذرائع
راولپنڈی (خاور نواز راجہ)سکول ایجوکیشن ڈیپارٹمنٹ پنجاب نے راولپنڈی سمیت صوبہ بھر کی ڈسٹرکٹ ایجوکیشن اتھارٹیز سے نان سیلری بجٹ کی مد میں طلبہ وطالبات کو دیئے گئے فنڈز کی تفصیلات طلب کر لیں ، غلط اعدادوشمارفراہم کرنے والے سکول ہیڈز کے ساتھ ساتھ اے ای اوز کے خلاف کارروائی کی جائے گی، ذرائع نے بتایاکہ سکول ایجوکیشن ڈیپارٹمنٹ پنجاب نے صوبے بھر کے پرائمری ، ایلیمنٹری ، ہائی اور ہائر سیکنڈری سکولوں میں زیرتعلیم فی طالب علم اخراجات کا جائزہ لینے کا فیصلہ کیا ہے ، اس سلسلے میں تمام ضلعی تعلیمی اتھارٹیز کے چیف ایگزیکٹو افسروں کو ہدایات جاری کر دی گئی ہیں کہ وہ یکم جولائی 2025 سے 31 دسمبر 2025 تک کے عرصے کے دوران فی طالب علم اخراجات سے متعلق مکمل اور تفصیلی ریکارڈ طلب کریں ، نان سیلری بجٹ مستحق بچوں کی کتابوں، کاپیوں اور وردیوں پر خرچ کیاجاتاہے ، اس کے لیے ہرسکول باقاعدہ فنڈز کی فیزبیلٹی بھجواتاہے ، جس کے مطابق انہیں فنڈز دیئے جاتے ہیں، راولپنڈی ضلع کے سکولوں کو اکتوبر 2025 میں نان سیلری بجٹ کی مد میں 11کروڑ 68لاکھ روپے دیئے گئے تھے ۔
