پختونخوا ، فیلڈ افسروں کیلئے بلٹ پروف گاڑیاں فراہم کرنیکا فیصلہ
پشاور(دنیا نیوز) خیبرپختونخوا میں بدامنی کے باعث فیلڈ افسروں کیلئے بلٹ پروف گاڑیاں فراہم کرنے کا فیصلہ کر لیا گیا۔
پختونخوا میں بڑھتی ہوئی بدامنی کے باعث صوبائی فیلڈ افسر عدم تحفظ کا شکار ہو گئے ہیں، جس کے پیش نظر ایڈمنسٹریشن ڈیپارٹمنٹ خیبرپختونخوا نے صوبے بھر میں فیلڈ سٹاف کو بلٹ پروف گاڑیاں فراہم کرنے کا فیصلہ کر لیا ہے ۔ ایڈمنسٹریشن ڈیپارٹمنٹ کے مطابق ابتدائی مرحلے میں 150 اسسٹنٹ کمشنرز اور ایڈیشنل اسسٹنٹ کمشنرز کو بلٹ پروف گاڑیاں فراہم کی جائیں گی، اس مقصد کے لیے افسران کے زیرِ استعمال موجودہ سرکاری گاڑیوں کو بلٹ پروف میں تبدیل کیا جائے گا۔محکمہ ایڈمنسٹریشن کا کہنا ہے کہ ایک گاڑی کو بلٹ پروف بنانے پر تقریباً 70 سے 80 لاکھ روپے لاگت آئے گی، یہ فیصلہ حالیہ بدامنی اور فیلڈ افسران پر پے در پے حملوں کے تناظر میں کیا گیا ہے ۔محکمہ کے مطابق سال 2025 کے دوران خیبرپختونخوا میں 2 ا سسٹنٹ کمشنرز کو دورانِ ڈیوٹی نشانہ بنایا گیا، 2 جولائی 2025 کو ا سسٹنٹ کمشنر فیصل اسماعیل کو باجوڑ میں نشانہ بنایا گیا جبکہ 2 دسمبر 2025 کو اسسٹنٹ کمشنر میر انشاہ ، شاہ ولی شاہ پر حملہ کیا گیا تھا۔ایڈمنسٹریشن ڈیپارٹمنٹ نے بتایا کہ مسلسل حملوں کے باعث فیلڈ سٹاف کو اپنی ذمہ داریاں انجام دینے میں شدید مشکلات کا سامنا ہے اسی لیے افسران کے تحفظ کو یقینی بنانے کے لیے یہ فیصلہ ناگزیر ہو چکا تھا۔
