اولمپکس:فوٹوگرافر نے چینی ٹیبل ٹینس سٹار کا پیڈل توڑ دیا
پیرس(سپورٹس ڈیسک )پیرس اولمپکس میں ٹیبل ٹینس کے مکسڈ ڈبلز مقابلے میں طلائی تمغہ جیتنے کا جشن منانے کے 24 گھنٹے سے بھی کم وقت کے بعد چین کے وانگ چوکین کو سنگلز مقابلے میں سویڈن کے ٹرولس مورگارڈ کے ہاتھوں شکست کا سامنا کرنا پڑا۔
وانگ چوکین منگل کے روز ساتھی کھلاڑی سن ینگشا کے ساتھ اپنا پہلا اولمپک گولڈ میڈل حاصل کرنے کے بعد بہت خوش تھے ۔لیکن ان کی خوشی جلد ہی بے اعتباری، غصّے اور مایوسی میں بدل گئی جب اُنہیں پتہ چلا کہ اس کا پیڈل جو کہ سنگلز مقابلے اور ٹیم ایونٹس کے لیے اہم تھا وہ کچھ پُرجوش فوٹوگرافرز کے ہاتھوں ٹوٹ گیا ہے ۔وانگ چوکین نے فوٹوگرافرز کے ہاتھوں پیڈل ٹوٹنے پر وضاحت طلب کرنے کی کوشش کی تو ان کے کوچ نے اُنہیں تسلی دیتے ہوئے گلے لگایا اور پرسکون رہنے کو کہا۔ جس کے بعد چینی ٹینس سٹار نے جلد ہی اپنا حوصلہ بحال کیا اور میڈیا سے گفتگو کرتے ہوئے کہا کہ فوٹو گرافرز نے جان بوجھ کر پیڈل نہیں توڑا اب میں اپنے بیک اپ پیڈل کے ساتھ آگے اچھی کارکردگی دکھانے کی کوشش کروں گا، شاید یہی میری قسمت ہے ۔
