چیمپئنز ٹرافی:آئی سی سی نے شیڈول کا ایونٹ منسوخ کردیا
لاہور(سپورٹس ڈیسک )چیمپئنز ٹرافی 2025 کے شیڈول پر ڈیڈ لاک برقرار ہے جس کی وجہ سے شیڈول کا اعلان تاخیر کا شکار ہوگیا۔
کرکٹ ویب سائٹ کے مطابق شیڈول کا معاملہ نہ سلجھنے پر آئی سی سی نے ایونٹ منسوخ کردیا ہے جو پہلے آج 11نومبر کو لاہورمیں شیڈول تھا۔ بھارت کے میچز کا فیصلہ نہ ہونے کی وجہ سے ایونٹ ختم کیا گیا ، متعلقہ آفیشل نے کہا ہے کہ شیڈول ابھی کنفرم نہیں ہے ، شیڈول کے حوالے سے میزبان اور حصہ لینے والی ٹیموں کے بورڈز سے بات چیت جاری ہے جبکہ کرکٹ ویب سائٹ کا کہنا ہے کہ آئی سی سی نے اس ڈویلپمنٹ کے حوالے سے کوئی جواب نہیں دیا۔آئی سی سی نے 100 دنوں کے حوالے سے تقریب رکھی تھی، تقریب میں شیڈول کا اعلان بھی کیا جانا تھا۔دوسری جانب پی سی بی کے ذرائع نے کہا ہے کہ یہ ٹرافی ٹور کا فلیگ آف اور ٹورنامنٹ برانڈنگ لانچ تھی، اس ایونٹ پر ابھی کام ہو رہا ہے ، شاید اس کو ری شیڈول کیا جائے گا۔ذرائع نے بتایا کہ لاہور میں آؤٹ ڈور سرگرمیاں ان دنوں مشکل ہیں، ایونٹ کے شیڈول کی نہ تو تصدیق کی تھی نہ اعلان کیا تھا اس لیے اس پر کچھ نہیں کہہ سکتے ۔
