پاک آسٹریلیا پہلا ٹی 20 آج ، بارش رنگ میں بھنگ ڈالنے کو تیار
برسبین (سپورٹس ڈیسک) پاکستان اورآسٹریلیا کے درمیان 3 میچز پر مشتمل سیریز کا پہلا ٹی ٹونٹی میچ آج برسبین میں کھیلا جائے گا۔۔
لیکن میچ میں بارش بھی رنگ میں بھنگ ڈالنے کوتیارہے ، میچ آج پاکستانی وقت کے مطابق دوپہر ایک بجے شیڈول ہے ۔پرسبین کے محکمہ موسمیات نے آج دوپہر ایک بجے سے بارش کی پیش گوئی کی ہے اور کہا گیا ہے کہ دن بھربارش ہوسکتی ہے اور ساتھ ہی ہلکی ہوا چلنے کا امکان ہے ۔دوسری قومی ٹیم کے کپتان محمد رضوان نے کہاہے کہ پلیئنگ الیون پر مشاورت مکمل ہوگئی اور ابھی نام ظاہر نہیں کرنا چاہتے لیکن ٹی ٹونٹی سیریز میں بیسٹ الیون ہی میدان میں اتاریں گے ۔برسبین میں میڈیا سے گفتگو کرتے ہوئے کپتان قومی ٹیم نے کہا کہ فخر زمان، افتخار احمد، شاداب خان، محمد عامر اور عماد وسیم کے متبادل اچانک تیار نہیں ہو سکتے اس لیے بڑے کھلاڑیوں کی جگہ لینے والوں کو محنت اور وقت درکار ہوگا۔اوپننگ سے متعلق سوال پر انہوں نے کہا کہ جو پاکستان کے لیے بہتر ہوگا، حسیب اللہ کو گلوز بھی دے سکتا ہوں اور وہی کریں گے جو ٹیم کے لیے بہتر ہو۔ آسٹریلیا میں کنڈیشنز آسان نہیں اور انٹرنیشنل کرکٹ میں چیلنجز ہمیشہ ہوتے ہیں، جیسن گلیسپی نے بہت محنت کی لہٰذا ٹیم بنانے کا کریڈٹ ان کو بھی جاتا ہے ۔ بھارٹی ٹیم پاکستان آئے گی تو ویلکم کریں گے ، چیمپیئنز ٹرافی کے معاملات کا دائرہ کار پی سی بی کا ہے ۔واضح رہے کہ قومی ٹیم نے برسبین میں تین گھنٹے تک بھرپور پریکٹس کی، ہیڈ کوچ جیسن گلیسپی کی قیادت میں پاکستانی کھلاڑیوں نے تینوں شعبوں میں محنت کی۔
