چیمپئنز ٹرافی :بھارت کاپاکستان نہ آنابدقسمی :شین واٹسن
سڈنی (سپورٹس ڈیسک )آسٹریلوی سابق آل راؤنڈر شین واٹسن نے کہاہے کہ یہ بدقسمتی ہے کہ بھارت چیمپئنز ٹرافی کیلئے پاکستان کا سفر نہیں کر رہا۔۔۔
آئی سی سی چیمپئنز ٹرافی کے سڈنی ٹور کے دوران انہوں نے کہا کہ اس میں کوئی شک نہیں کہ پاکستان بھارت میچ دیکھنا ہر کوئی پسند کرتا ہے ، ان دونوں ٹیموں کا جب بھی مقابلہ ہوتا ہے تو یہ ایک خاص وقت ہوتا ہے ۔ بطور آسٹریلوی میں جانتا ہوں کہ انگلینڈ ہمارے لیے کتنا بڑا حریف ہے ، پاکستان اور بھارت بھی اسی طرح بڑے حریف ہیں، کوئی بھی کرکٹ فین یہ میچ مس کرنا نہیں چاہتا۔ میں سمجھتا ہوں کہ چیمپئنز ٹرافی کا پاکستان میں انعقاد ان کی پوری قوم کے لیے ایک خاص لمحہ ہے ۔ کرکٹ فینز کو اپنے ملک میں ورلڈ سٹارز دیکھنے کا موقع ملے گا، مجھے 2019ء میں پاکستان سپر لیگ پاکستان میں کھیلنے کا موقع ملا، پاکستان جانا اور پھر وہاں کھیلنا یہ میرے لیے ایک خاص بات تھی، پاکستان میں لوگوں کی کرکٹ سے محبت اور اس کو انجوئے کرنا دیکھنا میرے لیے اچھی بات تھی، پاکستان کے فینز براہ راست ورلڈ کلاس کرکٹ دیکھنے سے محروم رہے ہیں۔ آئی سی سی ایونٹ کا اس ملک میں ہونا اس کے لیے بہت اچھا ہے ، فینز اپنی آنکھوں کے سامنے دنیا کے بڑے سٹارز کو ایکشن میں دیکھیں گے ، یقینی طور پر یہ ان کے لیے اسپیشل لمحہ ہو گا۔
