بنگلہ دیش کیخلاف قومی سکواڈ کا اعلان ، شاہین ، بابر ، رضوان آئوٹ
لاہور(سپورٹس ڈیسک)بنگلادیش کے خلاف تین ٹی ٹونٹی میچز کی سیریز کیلیے پاکستان کے 16 رکنی سکواڈ کا اعلان کر دیا گیا۔
سلمان علی آغا بنگلادیش کے خلاف سیریز میں قومی ٹیم کی قیادت کریں گے ۔ سیریز کے تینوں میچز لاہور کے قذافی سٹیڈیم میں کھیلے جائیں گے جبکہ میچز کے شیڈول کا اعلان بھی کر دیا گیا ہے ۔فاسٹ بولر حسن علی، فخر زمان اور صائم ایوب کی قومی ٹیم میں واپسی ہوئی ہے جبکہ حسین طلعت، صاحبزادہ فرحان اور فہیم اشرف کو بھی سکواڈ میں شامل کیا گیا۔فاسٹ بولر نسیم شاہ اور محمد وسیم جونیئر بھی سکواڈ میں جگہ بنانے پر کامیاب ہوگئے ۔عبدالصمد، جہانداد خان، عباس آفریدی کو سکواڈ سے ڈراپ کر دیا گیا جبکہ فاسٹ بولر شاہین آفریدی ٹی ٹونٹی سکواڈ میں جگہ نہ بنا سکے ۔محمد علی، عمیر بن یوسف، سفیان مقیم اور عثمان خان کو بھی ڈراپ کر دیا گیا اور سابق کپتان بابر اعظم اور محمد رضوان بھی سکواڈ کا حصہ نہیں ہیں۔پاکستان سکواڈ میں سلمان علی آغا (کپتان)، شاداب خان (نائب کپتان)، ابرار احمد، فہیم اشرف، فخر زمان، حارث رؤف، حسن علی، حسن نواز، حسین طلعت، محمد عرفان خان، خوشدل شاہ، محمد حارث (وکٹ کیپر)، محمد وسیم جونیئر، نسیم شاہ، صاحبزادہ فرحان (وکٹ کیپر) اور صائم ایوب شامل ہیں۔
