ٹی ٹونٹی ورلڈکپ: پاکستان بنگلہ دیش کے میچز کی میزبانی کیلئے تیار
سری لنکا میں گراؤنڈز کی کمی پر پاکستان کے تمام میدان ان میچز کی میزبانی کے لیے دستیاب ،پاکستانی ٹیم کے میچز سری لنکا میں شیڈول ہیں پاکستان کے وینیوز حاضر ، چیمپئنز ٹرافی،آئی سی سی ویمن کوالیفائر پاکستان میں ہوچکے تو یہ میچز بھی آسانی سے کرا سکتے ہیں،پی سی بی ذرائع
لاہور(سپورٹس ڈیسک)آئی سی سی ٹی ٹونٹی ورلڈ کپ میں بنگلہ دیش ٹیم کے میچز کی میزبانی کے لیے پاکستان بھی تیار ہے ۔ذرائع کے مطابق سری لنکا میں گراؤنڈز کی کمی پر پاکستان کے تمام میدان ان میچز کی میزبانی کے لیے دستیاب ہیں۔پی سی بی ذرائع کا کہنا ہے کہ سری لنکا کے وینیوز دستیاب نہیں تو پاکستان کے وینیوز حاضر ہیں، چیمپئنز ٹرافی اور آئی سی سی ویمن کوالیفائر پاکستان میں ہوچکے تو یہ میچز بھی آسانی سے کرا سکتے ہیں۔ سکیورٹی وجوہات پر بنگلہ دیش کرکٹ بورڈ بھارت جاکرکھیلنے سے انکارکرچکا ہے ۔ بنگلہ دیش کے میچز کہاں ہوں گے ، اس کا فیصلہ اب آئی سی سی نے کرنا ہے ۔
بنگلہ دیش کرکٹ بورڈ انٹرنیشنل کرکٹ کونسل کو دو خطوط کے ذریعے واضح کرچکا کہ اس کے میچز سری لنکا منتقل کیے جائیں وہ بھارت میں اپنی ٹیم ہرگز نہیں بھجیں گے ۔آئی سی سی ٹی ٹونٹی ورلڈ کپ کے میزبان بھارت اور سری لنکا ہیں، پاکستانی ٹیم کے انکار کے بعد آئی سی سی نے پہلے ہی پاکستان کے تمام میچز سری لنکا میں شیڈول کیے ہیں۔ بنگلہ دیش کے تین میچز کولکتہ اورایک ممبئی میں رکھا گیا ہے ۔انتہاپسند بھارتیوں کی جانب سے بنگلہ دیش کے فاسٹ بولر مستفیض الرحمان کو جان سے مارنے کی دھمکی دینے اور انہیں آئی پی ایل سے نکالنے کے مطالبے پر بھارتی کرکٹ بورڈ نے کولکتہ نائٹ رائیڈرز کے مالک اداکار شاہ رخ خان کو اپنی ٹیم سے بنگالی کرکٹر کو نکالنے کی ہدیات کی تھی جس کے بعد بنگلہ دیش کرکٹ بورڈ نے مؤقف اختیار کیا ہے کہ اگربھارت ایک کھلاڑی کو سکیورٹی نہیں دے سکتا تو پھر وہاں پوری بنگلہ دیش ٹیم کی حفاظت کیسے یقینی بنائے گا۔
