جراثیم کو چن چن کر منٹوں میں مارنے والی نینو ڈرل مشین
جراثیم کو باقاعدہ طور پر شناخت کرکے ان پر حملہ کرکے طبعی طور پر انہیں مارنے کا ایک راستہ سامنے آیا ہے ۔
ہیوسٹن(نیٹ نیوز)جراثیم کو باقاعدہ طور پر شناخت کرکے ان پر حملہ کرکے طبعی طور پر انہیں مارنے کا ایک راستہ سامنے آیا ہے ۔ رائس یونیورسٹی کے سائنسدان جیمز ٹور کی نگرانی میں ایک سالماتی (مالیکیولر) موٹر بنائی گئی ہے جو روشنی سے سرگرم ہوتی ہے ۔ اگراس پر مناسب روشنی ڈالی جائے تو یہ ایک سیکنڈ میں 30 لاکھ مرتبہ گھومتی ہے ۔ اس نینو ڈرل مشین کو جراثیم اور بیماری کے خلیات کے قریب لے جاکر انہیں باقاعدہ طبعی طور پر تباہ کیا جاسکتا ہے ۔ تجربہ گاہ میں نینوڈِرل مشین نے ایک منٹ میں کئی جراثیم اور بیکٹیریا کو ہلاک کرڈالا۔اس کے علاوہ ماہرین نے تجربہ گاہ میں ثابت کیا کہ نینوڈرل سے پانی میں موجود خوردبینی کیڑوں، پلانکٹن اور دیگر حشرات کو مارا جاسکتا ہے لیکن ان کا ہدف وہ بیکٹیریا ہیں جو مزاحمت پیدا کرتے ہوئے لاتعداد اینٹی بائیوٹکس کو ناکارہ بنا چکے ہیں۔ نینو ڈرل سے ایکزیما اور جلد کے سرطان کا ابتدائی درجے میں علاج کرنا بھی ممکن ہوگا جبکہ دیگر بہت سے اطلاقات بھی سامنے آسکتے ہیں۔
