عام ہیڈفون کو طبی سینسر میں بدلنے والی چِپ تیار
دنیا بھر میں استعمال ہونے والے ہیڈ فون اور ایئرفون صرف آواز سننے کیلئے استعمال ہوتے ہیں
نیویارک(نیٹ نیوز)تاہم اب ایک چپ کا اضافہ کرکے انہیں نہایت کارآمد سینسر میں بدلا جاسکتا ہے ۔رٹگرز یونیورسٹی کے انجینئروں نے انتہائی کم خرچ اور آسان چِپ بنائی ہے جو ہیڈفون کو سینسر بنادیتی ہے اور اس کی ریڈنگ سمارٹ فون پر آسکتی ہے ۔ اگرچہ ابھی یہ سینسر بڑا ہے لیکن اسے مزید حساس اور چھوٹا بنایا جاسکتا ہے جس پر کام جاری ہے ۔ اس ایجاد کو ‘ہیڈفائی’ کا نام دیا گیا ہے ۔ اس طرح ایک چپ کے اضافے سے ہیڈفون دل کی دھڑکن ناپنے ، جائرو سکوپ، اسراع پیما ، مائیکروفون اور دیگرآلات کا کام کرسکتے ہیں۔اس ایجاد کے تحت تین ڈالر سے لے کر 15 ہزار ڈالر تک کے ہیڈفون استعمال کئے گئے ۔ اس کے بعد ہیڈفائی نے 97 سے 99.5 تک درستگی سے یوزر کو شناخت کیا۔ اس چپ کی بدولت دنیا بھر میں ایک انقلاب آسکتا ہے ۔
