الیکشن کمیشن کی تشکیل نو کا سوال

1973ء کے آئین کے تحت جمہوریت کی تلاش میں ہونے والے9انتخابات کے ذریعے پانچ جمہوری جماعتیں مکمل شخصی وراثت بن گئی ہیں۔ یہ نو کی نو خالص جمہوری حکومتیں قوم کو پریشانی، مہنگائی‘ بے روزگاری‘ انصاف کی عدم فراہمی اور دہشت گردی سے نجات دلانے میں مکمل نااہل ثابت ہوئیں۔ آئین کے 32 آرٹیکلز پاکستان کے عوام کے حقوق کی ضمانت دیتے ہیں۔ ان سب سے انحراف کیا گیا۔ 1973ء کا آئین صرف حاکمیت کے قوانین پر مبنی ہے جو کسی نظام کو وضع کرنے کی اہلیت نہیں رکھتے۔ وزیرستان پاکستان کا حصہ ہے لیکن محسوس ہوتا ہے کہ ہمارے حکمرانوں نے کبھی اسے پاکستان کا حصہ نہیں سمجھا۔ وہاں نہ پہلے آئین پاکستان کا اطلاق ہوتا تھا اور نہ اب ہو رہا ہے۔ پاکستانی کی پہلی دستور ساز اسمبلی نے 9سال کی کاوشوں کے بعد وحدانی طرز کی بنیاد پر 23مارچ1956ء کو اسلامی جمہوریہ پاکستان کا آئین نافذ کیا۔ اس طرح8جون1962ء کوآئین نافذ کیا گیا تو قبائلی علاقے سرزمین بے آئین تھے۔ اس ملک کے ہر شہری کے بنیادی حقوق کا تحفظ کیا گیا لیکن قبائلی علاقوں کے عوام کے بنیادی حقوق کی یہ آئین ضمانت نہیں دیتا۔

پاکستان میں انتخابات آئین کے آرٹیکل 63, 62, 38, 3, 2.Aکی روح کے مطابق کبھی بھی نہیں ہوئے۔ حکومتیں انتخابات کو آئین کی روح کے مطابق منعقد نہ کروا کر آئین سے انحراف کرتی رہی ہیں۔ الیکشن کمیشن کے اختیارات کے تعین کے بارے میں 1973ء کے دستور میں واضح حکمت عملی طے نہیں ہوئی۔ اسے بڑی رازداری سے تہہ در تہہ آئینی دفعات اور قوانین میں جکڑکے رکھا گیا ہے۔ اس کے تمام فیصلے الیکشن ٹربیونلز ، الیکشن اسٹیبلشمنٹ، ڈسٹرکٹ ریٹرننگ افسران، ریٹرننگ افسران، عدالت عالیہ اور عدالت عظمیٰ کے ذریعے کیے جاتے ہیں۔ الیکشن کمیشن کسی حلقے کا انتخاب کالعدم قرار دینے، بعض پولنگ اسٹیشنوں پر ازسرنو پولنگ کرانے، الیکشن عملے کا تقرر کرنے، پولنگ اسٹیشنوں کے لیے جگہ کا تعین کرنے، ضابطہ اخلاق پر عمل درآمد کرانے، کاغذات ِ نامزدگی منظور یا نا منظور کرنے کے تمام مراحل، الیکشن کا رزلٹ تیار کرنے، یا کسی حلقے میں از سر نو گنتی کرانے کا فیصلہ کرنے کا از خود مجاز نہیںہے۔ اسے الیکشن کے ہر مرحلے پر ریٹرننگ افسران کے رحم و کرم پر چھوڑ دیا گیا ہے۔ عدلیہ کے ریٹرننگ افسران الیکشن کمیشن کی طرف دیکھنے کے بجائے متعلقہ ہائی کورٹس کے اشارے کے منتظر رہتے ہیں۔

سابق چیف جسٹس سپریم کورٹ کے دور میں الیکشن کمیشن کے معاملات میں مداخلت کی گئی جو کہ بادی النظر میں آرٹیکل 219کی خلاف ورزی ہے۔ الیکشن کمیشن کو دبائو میں رکھا اور سیکرٹری اشتیاق احمد خاں کو بلا وجہ ہراساںکیا گیا۔ اسی بناء پر انہیں اپنے عہدے سے مستعفی ہونا پڑا۔ 18ویں ترمیم کے تحت الیکشن کمیشن پارلیمانی کمیٹی اور پارلیمانی سیاسی جماعتوں کے نرغے میں آگیا۔ انتخابات میں دھاندلی کے شاکی سیاستدانوں اور دیگر اپوزیشن جماعتوں کو چاہیے کہ 18ویں ترمیم اور آئین کے آرٹیکل 213میں مزید ترامیم کر کے اور آئین کے آرٹیکل 213میں قومی مفادات میں ترمیم کر کے الیکشن کمیشن کی آئندہ انتخابات کے لئے تشکیل نو کرائیں اور اس آئینی اِدارے کو پارلیمانی سیاسی جماعتوں کے اثرو رسوخ سے آزاد کروائیں۔ الیکشن کمیشن کو مالی طور پر خود مختار اور انتظامی طور پر فعال، بااثر اور آزاد بنانے کے لئے صدر پرویز مشرف نے 10مئی 2000ء کو الیکشن آرڈر2000ء کے تحت مکمل آزادی سے ہمکنار کر دیا تھا اور اس سے پہلے کسی جمہوری حکومت نے پاکستان کے الیکشن کمیشن کو بااختیار بنانے کی سعی نہیں کی تھی۔

جمہوری دور میں18ویں ترمیم کے تحت پارلیمانی کمیٹی کے ارکان‘ جنہوں نے آئندہ انتخابات میں حصہ لینا ہوتا ہے‘ الیکشن کمیشن کے ارکان اور چیف الیکشن کمشنر کا تقرر کرتے ہیں اور ان سب کے اپنے اپنے مفادات ہوتے ہیں۔ عمران خان اور ان کے ہمنوا اپوزیشن ارکان کو چاہیے کہ وہ زمینی حقائق کے مطابق آئین

میں ترامیم کرائیں اور حکومت سے مطالبہ کریں کہ وہ آئین کے آرٹیکل 213پر نظر ثانی کرتے ہوئے پارلیمانی کمیٹی کے بجائے چیف جسٹس اور چاروں صوبائی ہائی کورٹس کے چیف جسٹس صاحبان پر مشتمل اعلیٰ سطح کا کمیشن بنائے جو چیف الیکشن کمشنر اور الیکشن کمیشن کے ارکان کا تقرر کرے‘ تاکہ الیکشن کمیشن حقیقی معنوں میں خود مختار، آزاد اور بااختیار ہو کر فرائض سر انجام دے سکے۔ اس طرح الیکشن کمیشن پارلیمانی سیاست کے اثر سے آزاد ہو گا اور درست سمت کی طرف گامزن ہو جائے گا۔ عوامی نمائندگی ایکٹ 76کے تحت انتخابات میں ریٹرننگ افسران پر مکمل کنٹرول نہیں ہوتا۔11مئی2013ء کے انتخابات سے پیشتر بھی جسٹس فخرالدین جی ابراہیم پر دبائو رکھا گیا اور ریٹرننگ افسران کی نگاہیں سابق چیف جسٹس کی طرف لگی رہیں اور ان کے خطبات سے الیکشن کمیشن کے ریٹرننگ افسران متاثر ہوتے رہے۔

میرے خیال میں سابق چیف جسٹس کے ریٹرننگ افسران سے خطاب اور بعدازاں انہیں لکھے گئے خطوط سے الیکشن کمیشن اپنی پالیسی کو بروئے کار لانے سے قاصر رہا۔ الیکٹرانک ووٹنگ مشین کے استعمال کے لئے آئین کے آرٹیکل 224میں ترمیم ضروری ہے۔ بھارت میں یہ تجربہ 20سال بعد کامیابی سے ہمکنار ہوا۔ پاکستان میں یہ کام چار پانچ سال میں مکمل ہو سکتا ہے۔ اس سے الیکشن میں دھاندلی کے امکانات ختم ہو سکتے ہیں اور الیکشن میں ووٹنگ کی شرح کا تناسب مزید بڑھ جائے گا۔

زمینی حقائق کی روشنی میںتجویز یہ ہے کہ پاکستان میں الیکشن کے منصفانہ انعقاد کے حوالے سے کچھ عرصے کے لیے‘ یعنی جب تک پارلیمنٹ، میڈیا اور عدلیہ مطلوبہ پختگی کی منزل حاصل نہیں کر لیتیں اور پاکستان سکیورٹی کے مسائل سے نکل کر اسلامی جمہوری فلاحی مملکت کی منزل کی طرف گامزن نہیں ہو جاتا‘ افواجِ پاکستان کو ایک رول دے دیا جائے۔ حقیقت یہ ہے کہ اس جمہوری دور میں سیاست، عدالت اور صحافت میں سب سے مؤثر رول عسکری اِداروں کا ہی ہے‘ لیکن چونکہ براہِ راست کنٹرول ان کے پاس نہیں‘ اس لیے وہ ملک کے سیاستدانوں کی نااہلی، کرپشن اور حکومتی اداروں کی کارکردگی کو بہتر نہیں بنا سکتے۔

یوں بہتر ہو گا کہ فوج کو حکومت میں آئینی کردار دے دیا جائے اور آئین میں ترمیم کر کے ان کا کردار نئے صوبوں کی تشکیل اور وفاق اور مرکز کے درمیان تعلقات، مذہب اور سیاست کے تعلق، عدلیہ کی تشکیل نو، میڈیا کے کردار اور اسی نوع کے دیگر بنیادی معاملات تک وسیع ہونا چاہیے اور موجودہ حالات میں سول ملٹری تعلقات کے معاملے کو حل کرنا ضروری ہے۔

موجودہ طرزِ جمہوریت کے اِس نظام میں اکثریت یعنی عوام کا نہیں بلکہ اقلیت یعنی حکمرانوں کے مفادات کا خیال رکھا گیا ہے۔ اس نظام نے قومی اِداروں کو کھوکھلا اور پاکستان کے عوام کو مفلوج کر دیا ہے۔