×

کراچی

11ربیع الاول کی بھی عام تعطیل دی جائے ، شاداب رضا

بند کریں

حکومت میلاد النبیؐ پربہترین انتظامات،عوام کو مکمل سہولیات فراہم کرےجشنِ ولادتِ رسولؐ خوشی، محبت اور امن کا پیغام ہے ،سربراہ سنی تحریک

کراچی (این این آئی)سربراہ پاکستان سنی تحریک شاداب رضا نقشبندی نے کہا ہے کہ حضور اکرم نورِ مجسم، سیدِ عالم، حضرت محمد مصطفیٰؐ وجہِ تخلیقِ کائنات اور تمام مسلمانوں کے لیے رحمت و ہدایت کا سرچشمہ ہیں۔ عاشقانِ رسولؐ جشنِ ولادتِ باسعادت کو عقیدت، محبت اور احترام کے ساتھ شایانِ شان طریقے سے منائیں گے ،جشنِ ولادتِ رسول ؐ پوری امتِ مسلمہ کے لیے خوشی، محبت، امن اور اتحاد کا پیغام ہے ، حکومت تمام متعلقہ اداروں کو متحرک کرکے میلاد النبیؐ کے پروگراموں کے لیے بہترین انتظامات کرے اور عوام کو مکمل سہولیات فراہم کرے ۔ان خیالات کا اظہار انہوں نے حکومت سے 11ربیع الاول کی چھٹی کا مطالبہ کرتے ہوئے کیا۔شاداب رضا نقشبندی نے حکومت سے مطالبہ کیا ہے کہ 11 ربیع الاول کی بھی عام تعطیل کا اعلان کیا جائے تاکہ مسلمانانِ پاکستان اپنے آقا و مولا حضرت محمد مصطفیؐ کی ولادتِ باسعادت کی خوشیاں بھرپور مذہبی جوش و جذبے کے ساتھ منا سکیں۔انہوں نے کہا کہ جشن عید میلا النبی ؐ شایان شان طریقے سے منانے کیلئے عاشقان رسولؐ گلی ،محلوں ،بازاروں اور گھروں کو سجا کر سبز جھنڈا لہرا رہے ہیں،پاکستان سنی تحریک کی عظیم الشان میلاد ریلی 11ربیع الاول کی رات لیاقت آباد ڈاکخانہ سے نکلے گی، اختتام چھٹن شاہ بابا کے مزار کھار ادر میں ہوگا ،12ربیع الاول کو میلاد جلوس مرکز اہلسنت معین پلازہ سے نکلے گا اورنمائش (نورانی چورنگی ) پاکستان سنی تحریک کے استقبالیہ کیمپ پر اختتام پذیر ہوگا۔انہوں نے کہا کہ حکومت ملک بھر میں عید میلاد النبیؐ کے جلسے ، جلوس، ریلیوں اور دیگر پروگراموں کے لیے فول پروف سیکیورٹی انتظامات یقینی بنائے ۔ تمام صوبوں، شہروں اور علاقوں میں انتظامی مسائل کو بروقت حل کیا جائے ، صفائی ستھرائی، سڑکوں کی مرمت، سیوریج، اسٹریٹ لائٹس اور دیگر ضروری انتظامات مکمل کیے جائیں تاکہ عاشقانِ رسول ؐ کودشواری کا سامنا نہ کرنا پڑے ۔

روزنامہ دنیا ایپ انسٹال کریں