پنجاب کو ملک کی معیشت کا انجن، ترقی کا مرکز بنائیں گے : مریم نواز
لاہور (دنیا نیوز)وزیراعلیٰ مریم نوازشریف نے کہاہے کہ پنجاب کو پاکستان کی معیشت کا انجن اور ترقی کا مرکز بنائیں گے ،ہم یوم پاکستان پر تعلیم، صحت، زراعت میں جدت کا عہد کرتے ہیں۔
23مار چ یوم پاکستان پر اپنے پیغا م میں مریم نواز شریف نے کہاکہ یوم پاکستان پر وطن عزیز کو ترقی یافتہ ممالک کی صف میں شامل کرنے کیلئے اپنی تمام تر صلاحیتیں بروئے کار لانے کا عہد کرتے ہیں۔ 23مارچ ہمیں قیام پاکستان کے سنہری اغراض و مقاصد کی یاد دہانی کراتا ہے ، اللہ تعالیٰ کے فضل وکرم سے پاکستان قائم ہوا اور تا قیامت شاد وآباد رہے گا،پاکستان کو اللہ تعالیٰ نے دنیائے اسلام کی پہلی ایٹمی طاقت بننے کا منفرد اعزاز بھی عطا کیا۔انہوں نے کہا کہ یوم پاکستان ہمیں حصول پاکستان کی بھرپور جدوجہد کے آغاز کی یاد دلاتا ہے ، یوم پاکستان پر پاک سر زمین کے تقدس اور حفاظت کے تقاضوں کے عہد کا اعادہ کیا جانا چاہئے ،یوم پاکستان پر اتحاد، ایمان اور نظم و ضبط کے سنہری اصولوں کو بھی دہرانا اوریاد رکھنا چاہئے ،پاکستان ہم سب کے لئے اللہ تعالیٰ کی عطا کردہ نعمت ہے ۔مریم نواز کا کہنا تھا کہ یوم پاکستان پر غربت میں کمی، عدم مساوات اور معاشرے کے کمزور طبقات کے تحفظ کا عہد کرتے ہیں ، یوم پاکستان پر عہد کرتے ہیں پنجاب کو قائد اعظم اور دیگر بانیانِ پاکستان کے ویژن کے مطابق بلندیوں پر گامزن کریں گے ۔
