بازاروں کیلئے ویمن پولیس سکواڈ قائم، خواتین کا تحفظ یقینی بنایا جائیگا : مریم نواز
لاہور(سٹاف رپورٹر)وزیراعلیٰ مریم نوازشریف کی ہدایت پر صوبہ بھر کے نمایاں بازاروں میں خواتین کے تحفظ کے لئے ویمن پولیس سکواڈقائم کر دیئے گئے اورصوبہ بھر میں گشت شروع کر دیا گیا۔
وزیراعلیٰ کے حکم پر بازاروں میں رش کے اوقات میں خواتین اوربچوں کے تحفظ کیلئے خصوصی ویمن پولیس سکواڈ گشت کریں گی۔ ویمن پولیس سکواڈ کی پیدل، سائیکل اورموٹر سائیکل سوار ٹیمیں بازاروں اورمارکیٹوں میں گشت کریں گی۔ سکواڈبازا روں اورمارکیٹوں میں شاپنگ کیلئے آنے والی خواتین کو ہراساں کرنے کے واقعات کی روک تھام کرے گا۔بازاروں میں سماج دشمن عناصر کی سرگرمیوں کی نگرانی کرے گا۔ سکواڈ شاپنگ کیلئے آنے والی خواتین،بچیوں کو پریشان کرنے کے واقعات کا سدباب بھی کرے گا۔ بازاروں میں عید کے رش کے باعث خواتین سے موبائل،پرس ، چھیننے اورڈکیتی وغیرہ کے واقعات کو روکنے میں مدد ملے گی۔ پیدل سکواڈ بھی بازاروں اور مارکیٹوں میں نگرانی کے فرائض سرانجام دیں گے ۔لاہور، راولپنڈی، سیالکوٹ، فیصل آباد، گوجرانوالہ، چنیوٹ، بورے والا، وہاڑی، خانیوال اور دیگر شہروں میں ویمن پولیس سکواڈ کا بڑے تجارتی مراکز میں گشت شروع ہوگیا۔
لاہور میں ڈولفن پولیس کا خصوصی سکواڈ بھی مارکیٹوں اوربازاروں میں خواتین ، بچوں کے تحفظ اورمعاونت کیلئے تعینات کر دیا گیا ہے ۔ڈولفن کا کوئیک رسپانس سائیکل سکواڈ لاہور کے 65 بڑے تجارتی مراکز پر تعینات کیا گیا ہے ۔ لاہور کے ڈی ایچ اے رایا، وائی بلاک ،اچھرہ،ا نار کلی اور لبرٹی مارکیٹ میں سائیکل سکواڈ پٹرولنگ کر رہا ہے ۔ کوئیک رسپانس سائیکل کے ساتھ ڈولفن بائی سکواڈ اور پی آر یو بھی موجود ہوگا۔ لاہور بھر میں 4ہزار سے زائد پولیس اہلکار سپیشل سکواڈ ڈیوٹی پر مامور ہوگا۔ ڈولفن پولیس کا فرینڈلی یونٹ افطار کے بعد مارکٹیں بند ہونے تک گشت کرے گا۔ بائی سائیکل پر مشتمل ڈولفن فورس سکواڈمعروف گلیوں،معروف بازاروں،مارکیٹوں اورگنجان علاقوں میں گشت کرے گا۔ اوکاڑہ میں پہلا ویمن پولیس سکواڈ پوری طرح متحرک کردیا گیا۔ پیدل،سائیکل اورموٹر سائیکل سوارپولیس کانسٹیبل نے معروف اورگنجان بازاروں میں گشت شروع کردیا۔مریم نواز کا کہنا ہے کہ خواتین اور بچوں کا تحفظ حکومت ہی نہیں پوری سوسائٹی کی ذمہ داری ہے ۔بازاروں اور گلیوں میں خواتین کا تحفظ ہر صورت یقینی بنایا جائے گا۔
