یکجہتی،سول ملٹری اور معاشرتی ہم آہنگی کیلئے قومی سطح کے اشتراک کی ضرورت:فیلڈ مارشل
ملتان ،راولپنڈی (سٹاف رپورٹر،خصوصی نیوز رپورٹر)چیف آف آرمی سٹاف فیلڈ مارشل عاصم منیر نے گزشتہ روز ملتان گیریژن کا دورہ کیا اورجدید زیڈ 10ایم ای ہیلی کاپٹر کی پاک آرمی ایوی ایشن میں شمولیت کی تقریب کی صدارت کی ۔
آئی ایس پی آر کے مطابق فیلڈ مارشل نے قومی اتحاد اور سول ملٹری ہم آہنگی کی اہمیت پر زور دیا اور فوج کی قومی خودمختاری اور علاقائی سالمیت کے تحفظ کے عزم کا اعادہ کیا۔چیف آف آرمی سٹاف فیلڈ مارشل سید عاصم منیر نے قومی خودمختاری اور جغرافیائی سالمیت کے تحفظ کیلئے پاک فوج کے غیر متزلزل عزم کا اعادہ کرتے ہوئے کہا ہے کہ قومی یکجہتی ، سول ملٹری ہم آہنگی اور ہائی بریڈ خطرات کے مقابلے اور معاشرتی ہم آہنگی کے فروغ کیلئے قومی سطح کے اشتراک کی ضرورت ہے ۔ آئی ایس پی آر اعلامیہ کے مطابق فیلڈ مارشل سید عاصم منیر نے ملتان گیریژن کا دورہ کیا، انہیں کور ہیڈکوارٹرز میں فارمیشن کی آپریشنل تیاریوں اور جاری تربیتی سرگرمیوں پر تفصیلی بریفنگ دی گئی، اعلیٰ معیار کی تیاریوں پر اطمینان کا اظہار کرتے ہوئے فیلڈ مارشل نے قومی خودمختاری اور جغرافیائی سالمیت کے تحفظ کیلئے پاک فوج کے غیر متزلزل عزم کا اعادہ کیا۔
سید عاصم منیر نے ماہرین تعلیم اور سول سوسائٹی کے نمائندوں سے تعارفی نشست میں بھی شرکت کی جہاں انہوں نے قومی یکجہتی ، سول ملٹری ہم آہنگی اور ہائی بریڈ خطرات کے مقابلے اور معاشرتی ہم آہنگی کے فروغ کیلئے قومی سطح کے اشتراک کی اہمیت پر زور دیا۔ دورے کے دوران چیف آف آرمی سٹاف نے پاک فوج کے فضائی شعبے میں جدید زیڈ 10 ایم ای ہیلی کاپٹر کی شمولیت کی تقریب کی صدارت کی، یہ جدید ترین ہیلی کاپٹر رات اور دن میں درستگی سے حملے کی صلاحیت رکھتا ہے ۔ چیف آف آرمی سٹاف نے مظفر گڑھ فیلڈ فائرنگ ریجنز میں نئے شامل کئے گئے زیڈ 10 ایم ای ہیلی کاپٹروں کی فائر پاور کا عملی مظاہرہ بھی دیکھا، اس جدید نظام کی شمولیت پاک فوج کے فضائی شعبہ کی جدیدیت کی جانب ایک اہم سنگ میل ہے جو میدان جنگ میں موثر رد عمل اور دشمن پر فیصلہ کن برتری قائم کرنے کی صلاحیت کو مزید مستحکم کرتا ہے ۔ جوانوں سے گفتگو کرتے ہوئے آرمی چیف نے ان کے بلند حوصلے ، پیشہ وارانہ مہارت اور جنگی تیاریوں کو سراہا۔ انہوں نے مشترکہ عسکری حربی حکمت عملی کے کامیاب مظاہرے کو سراہتے ہوئے کہا کہ یہ پاک فوج کے اس عزم کی عکاسی کرتا ہے کہ وہ بدلتی ہوئی جنگی نوعیت میں فیصلہ کن برتری برقرار رکھنے کیلئے پرعزم ہے ۔ قبل ازیں ملتان گیریژن آمد پر کور کمانڈر ملتان نے فیلڈ مارشل سید عاصم منیر کا پرتپاک استقبال کیا۔
