مقررہ اوقات میں گیس پریشر بہتر رکھا جائے : وزیر پٹرولیم
انفرادی شکایات کا ازالہ، صارفین کو زیادہ سے زیادہ ریلیف دیا جائے :علی پرویز گھریلو صارفین کو گیس فراہمی میں 26فیصد اضافہ ہوا:وفاقی وزیر کو بریفنگ
اسلام آباد(نامہ نگار،سٹاف رپورٹر)وفاقی وز یر پٹرولیم علی پرویز ملک نے کہا مقررہ اوقات میں گیس پریشر بہتر رکھا جائے اور انفرادی شکایات کا فوری ازالہ کیا جائے ، صارفین کو زیادہ سے زیادہ ریلیف فراہم اور کم پریشر سے متعلق شکایات کو ترجیحی بنیادوں پر حل کیا جائے۔ انہوں نے ان خیالات کا اظہار وزیراعظم کی ہدایت پر اجلاس کی صدارت کرتے ہوئے کیا، موسم سرما کے آغاز میں مجموعی گیس فراہمی کی صورتحال اور سوئی گیس کمپنیوں کے شکایات ازالہ کے نظام کی کارکردگی کا جائزہ لیا گیا۔
ایس این جی پی ایل اور ایس ایس جی سی کے منیجنگ ڈائریکٹرز نے بریفنگ میں بتایا کہ اس سال گیس کی فراہمی پچھلے سال کے مقابلے میں واضح طور پر بہتر ہے ، گھریلو صارفین کو مجموعی گیس فراہمی میں تقریباً 26 فیصد اضافہ ہوا ہے ۔ دونوں کمپنیاں صارفین کی شکایات ترجیحی بنیادوں پر نمٹا رہی ہیں۔ وفاقی وزیر نے کہا موسم سرما میں عوام کی کھانے پکانے کی ضروریات یقینی بنانے کیلئے مناسب اقدامات کیے جا رہے ہیں۔ ایم ڈیز نے بتایا کہ کمپلینٹ مینجمنٹ سسٹم اور 1199 ہیلپ لائن مکمل فعال ہیں۔ ادھر قومی اسمبلی اجلاس میں وزیر پٹرولیم علی پرویز ملک نے شاہدہ بیگم اور نور عالم خان کے توجہ دلاؤ نوٹسز کے جواب میں کہا کہ گزشتہ سال کی نسبت اس سال گیس لوڈ شیڈنگ اور شکایات میں واضح کمی آئی ہے۔
گزشتہ سال نومبر میں گھریلو صارفین کو ایل این جی 460 ایم ایم سی ایف ڈی فراہم کی جا رہی تھی اور رواں سال 590 ایم ایم سی ایف ڈی گیس فراہم کی جا رہی ہے ۔ نومبر میں 80 سے 90 ہزار شکایات موصول ہوئیں، 70 سے 80 فیصد اوگرا کے حوالے سے تھیں جنہیں 36 گھنٹوں کے اندر حل کر دیا تھا۔ جہاں گیس پریشر کا مسئلہ ہے نشاندہی کریں حل کیا جائے گا۔ انہوں نے بتایا پشاور میں 29 آپریشنل فیز کی مرمت پر 50 کروڑ سے زائد فنڈز لگ چکے ہیں، ڈھائی سو کلومیٹر پائپ لائن پر پر کام جاری ہے جس پر 2 ارب روپے سے زائد لاگت آئے گی۔
