سٹریٹ موومنٹ والوں کو نعروں کا جواب دینے والا کوئی نہ ملا، عظمیٰ
پاکستان کے یورپ لاہور کی بہت سیر کر لی اب شہریوں کو سکھ کا سانس لینے دیں واپس جا کر پختونخوا کے لوگوں کی بھی داد رسی کریں اور انکے مسائل بھی سنیں
لاہور(مانیٹرنگ ڈیسک)وزیر اطلاعات و ثقافت پنجاب عظمیٰ بخاری نے پی ٹی آئی کی سٹریٹ موومنٹ کے حوالے سے کہا کہ سٹریٹ موومنٹ کے دعوے تو بڑے تھے لیکن نعروں کا جواب دینے والا ان کو کوئی نہ ملا ۔سوشل میڈیا پلیٹ فارم ایکس پر اپنے بیان میں انہوں نے کہا کہ بنگلہ دیش کی تصاویر لگا کر خوشیاں منائی جا رہی تھیں، تاہم آج دن کی روشنی میں اس سٹریٹ موومنٹ کا پول کھل گیا ہے ۔انہوں نے کہا کہ سٹریٹ موومنٹ والوں کو نعروں کا جواب دینے والا بھی کوئی نہ ملا۔عظمیٰ بخاری کا کہنا تھا کہ پاکستان کے یورپ لاہور کی بہت سیر کر لی گئی ہے ، اب خدا کے لیے واپس تشریف لے جائیں اور لاہور کو سکھ کا سانس لینے دیں، پروٹوکول میں لاہور کو خوب دیکھ لیا گیا۔وزیر اطلاعات پنجاب نے مزید کہا کہ واپس جا کر خیبر پختونخوا کے لوگوں کی بھی داد رسی کریں اور ان کے مسائل بھی سنیں۔
