پاکستان 2026 میں بھی عالمی منظر نامے پر نمایاں
یواین انسانی حقوق کونسل کا رکن،ڈیجیٹل کوآپریشن آرگنائزیشن کی صدارت کریگا ڈار کا کل سے دورہ چین ، تیونس کا اعلیٰ سطح وفد، بنگلہ دیشی سیکرٹری خارجہ یہاں آئینگے
اسلام آباد(مانیٹرنگ ڈیسک)پاکستان 2025 کی طرح نئے سال میں عالمی منظر نامے پر نمایاں رہے گا، 2026 کے آغاز پر پاکستان نے اقوام متحدہ انسانی حقوق کونسل کی رکنیت سنبھال لی، اسی سال پاکستان ڈیجیٹل کوآپریشن آرگنائزیشن کی صدارت سنبھالے گا،سفارتی ذرائع کے مطابق جنوری میں ہی یو ایس فیڈرل ایوی ایشن ایڈمنسٹریشن کا اعلیٰ سطح وفد پاکستان کا دورہ اور پاکستانی ایئرپورٹس کا تفصیلی آڈٹ کرے گا۔
اس اقدام سے پاک امریکا براہ راست پروازیں شروع کرنے میں مدد ملے گی۔جنوری کے اختتام پر تاجکستان کے صدر پاکستان کا دورہ کریں گے ۔تاجکستان کے صدر کے ہمراہ ایک اعلیٰ سطح وفد بھی پاکستان آئے گا۔نائب وزیراعظم اسحاق ڈار کل 3 جنوری سے چین کا اعلیٰ سطح دورہ کر رہے ہیں۔4جنوری 2026 سے بیجنگ میں پاک چین اعلیٰ سطح تزویراتی مذاکرات کا انعقاد ہو گا۔17 جنوری کو وزیراعظم شہباز شریف نجی دورے پر برطانیہ روانہ ہوں گے ۔19 جنوری کو وزیراعظم لندن سے سرکاری دورے پر ڈیووس پہنچیں گے۔
اپریل میں بنگلہ دیش کے سیکرٹری خارجہ کے دورہ پاکستان کی تیاریاں کی جا رہی ہیں۔اپریل میں پاکستان بنگلہ دیش 7 ویں سیکرٹری خارجہ سطح مذاکرات کا انعقاد کیا جائے گا۔رواں برس تیونس کا اعلیٰ سطح وفد پاکستان میں 10ویں مشترکہ کمیشن اجلاس میں شرکت کرے گا، رواں برس آسٹریلیا کی وائٹ بال ٹوور پر مردانہ کرکٹ ٹیم کا دورہ پاکستان متوقع ہے ۔رواں برس پاکستان میں پاک چین دوستی کے 75 برس مکمل ہونے پر متعدد تقریبات کا انعقاد کیا جائے گا۔
