اور کیا چاہیے؟

میرے سامنے ایک تصویر ہے۔ وفاقی وزیر اسحاق ڈار درمیان میں بیٹھے ہیں۔ ان کے دائیں طرف پی ٹی آئی کا دایاں پلڑا یعنی جہانگیر ترین اور بائیں جانب بایاں پلڑا یعنی شاہ محمود قریشی تشریف فرما ہیں۔یہ تصویر گوگل کرتے ہوئے سامنے آئی۔ یہ تینوں ایک پریس کانفرنس کر رہے ہیں جس میں گزشتہ برس کے اوائل میں دھاندلی کے حوالے سے جوڈیشل کمیشن قائم کرنے پر اتفاق کیا گیا۔یہ اتفاق رائے دھرنا شروع ہونے کے آٹھ ماہ بعد ہوا۔ اس دوران بہت سا پانی پلوں کے نیچے سے بہہ گیا لیکن پی ٹی آئی کو بالآخر پرانی تنخواہ پر ہی کام کرنا پڑا۔ جب یہ جماعت دھرنا شروع کرنے جا رہی تھی اور لاہور میں زمان پارک پر لوگ جمع ہو رہے تھے تو وزیراعظم نواز شریف ٹی وی پر نمودار ہوئے اور دھاندلی پر جوڈیشل کمیشن قائم کرنے کا اعلان کیا۔ مگر میں نہ مانوں کی رٹ لگائے پی ٹی آئی نے طے شدہ پلان کے تحت اسلام آباد پر چڑھائی کر دی۔ لوگوں نے بہت کہا ایسے تو کوئی بھی گروہ پارلیمنٹ کے سامنے جمع ہو کر اپنے مطالبات منوا سکتا ہے اور اگر یہ سلسلہ چل نکلا تو کوئی حکومت محفوظ نہیں رہے گی۔ لیکن ان باتوں کی کسے پروا تھی۔ طے شدہ ایجنڈے سے پیچھے ہٹنا ممکن نہ تھا کیونکہ بعض قوتوں نے ہلہ شیری دے رکھی تھی۔ یہ بھی کہا تھا شیروانی تیار رکھیں‘ آپ جلد وزیراعظم بننے والے ہیں۔ یہ اور بات ہے کہ پی ٹی آئی اور عوامی تحریک کو آگے کرنے کا مقصد صرف حکومت پر کیچڑ اچھالنا اور اسے بیک فٹ پر لانا تھا۔ بالآخر کمیشن بنا اور 23جولائی 2015ء کو کمیشن کی رپورٹ بھی آ گئی جس میں صاف کہا گیا کہ الیکشن منصفانہ تھے اور قانون کے تقاضوں کے مطابق منعقد کئے گئے تھے۔ جوڈیشل کمیشن قائم کرتے وقت حکومت نے معاہدے میں صاف لکھا تھا کہ دھاندلی ثابت ہو گئی تو حکمران حکومت سے علیحدگی اختیار کر لیں گے۔ یہ تمام شقیں تحریک انصاف نے ہی معاہدے میں شامل کروائی تھیں۔ عمران خان نے جوڈیشل کمیشن کا فیصلہ قبول کر لیا اور یوں ایک معاملہ جو دھرنے کے بغیر بھی حل ہو سکتا تھا‘ بالآخر حکومت اور پی ٹی آئی کے مذاکرات کی روشنی میں ایک جوڈیشل کمیشن کے قیام پر منتج ہوا۔

اس وقت ایک نیا مسئلہ درپیش ہے اور ایک نئے جوڈیشل کمیشن کی جستجو جاری ہے۔ پاناما لیکس میں وزیراعظم کے بچوں سمیت اڑھائی سو پاکستانیوں کے نام آئے جس کے بعد جس تیزی سے بھونچال آیا‘ اسی تیزی سے اس کی گرد بیٹھ رہی ہے۔ وزیراعظم نے یک رکنی جوڈیشل کمیشن کا اعلان کیا جسے مسترد کر دیا گیا۔اپوزیشن جماعتیں کسی ایک نام پر متفق ہو نہیں پائیں۔ پی ٹی آئی اس ایشو کو ایک مرتبہ پھر سیاسی فوائد کے لئے استعمال کرنا چاہتی ہے۔ پیپلزپارٹی اور دیگر جماعتیں بھی احتساب چاہتی ہیں لیکن ایک ایسے میکانزم کے تحت جو سب کے لئے قابل قبول ہو۔ خان صاحب نے حسب معمول رائے ونڈ پر چڑھائی کا اعلان کر رکھا ہے۔ اس پر دیگر جماعتیں تو چھوڑیں‘ خود ان کی اپنی جماعت

پوری طرح راضی نہیں ہے۔ جس طرح دھرنے میں دس لاکھ لوگوں کو لے جانے کا دعویٰ چند ہزار کی شکل میں نکلا‘ رائے ونڈ دھرنا بھی اس سے مختلف نہیں ہو گا۔راولپنڈی اسلام آباد میں تحریک انصاف کے تین رکن اسمبلی منتخب ہوئے۔ یہ لوگ ایک ایک لاکھ لوگ بھی لاتے توصورتحال مختلف ہوتی۔ چنانچہ لاہور میں بھی دھرنے سے سوائے عام لوگوں کو مشکلات کے کچھ حاصل نہیں ہو گا۔ جہاں تک خاں صاحب کی بات ہے ‘ وہ صرف جوش و جذبہ دلانے کی حد تک ذمہ داری سر انجام دے رہے ہیں۔ لوگ البتہ اس انداز سیاست سے اُکتانے لگے ہیں۔ ان کی طبیعت میں جو احتجاج پسندی اور جلد بازی ہے‘ شاہ محمود قریشی جیسے لوگ اس سے بالکل مختلف ہیں۔گویا پی ٹی آئی میں پیپلزپارٹی اور جے یو آئی کی پالیسیاں اور جراثیم بدرجہ اتم موجود

ہیں۔ رہی بات خاں صاحب کی تو انہوں نے تو پرویز مشرف کو بھی سر آنکھوں پر بٹھالیا تھا اور پھر ان کے خلاف ہو گئے۔ جسٹس وجیہ الدین کی نیک نامی پر کون شک کر سکتا ہے؟ ان کو موصوف اپنی پارٹی میں لائے تو کھڈے لائن لگا دیا‘ کس کے کہنے پر اور کیوں؟ آج حالات یہ ہو چکے کہ جو سیاسی بندہ ان کی جماعت چھوڑے یہ اسے بکری کہہ کر پکارنے لگتے ہیں۔ میں حیران ہوں کراچی میں امجد اللہ خان کو پی ٹی آئی سے بہتر جماعت ایم کیو ایم نظر آئی۔ حالات اس نہج پر پہنچ جائیں گے‘ کون جانتا تھا۔کچھ دن قبل عمران خان کہہ رہے تھے نون لیگ میں برداشت نہیں۔ کیا خاں صاحب کو دھرنے کے دوران کی باتیں بھول گئیں جب ٹی وی چینلز تک کو تنقید کرنے پر نشانہ بنایا گیا ۔دو سال جب دھرنے اور اِدھر اُدھر کی باتوں میں گزار لئے تو موصوف نے فرمایا‘ اب میں خیبرپختونخوا پر پوری توجہ دوں گا۔ کیا بہتر نہ تھا کہ یہی زور اپنے صوبے کو چمکانے دمکانے پر لگایا جاتا؟

کسی گائوں کے ایک ڈیرے میں اکٹھ لگا تھا۔ کسی اہم مسئلے پر بحث جاری تھی۔ سامعین میں ایک بندہ بڑھ بڑھ کر لقمے اور مشورے دے رہا تھا۔ ہر بات میں کیڑے نکالتا اور ہر کسی کا منفی پہلو سامنے لاتا۔ گائوں کے بڑوں نے جب اسے اس طرح اچھلتے کودتے دیکھا تو کہا‘ آپ ذرا منصف کی کرسی پر آ جائیں اور بتائیں یہ مسئلہ کیسے حل ہو گا؟ جیسے ہی وہ کرسی پر بیٹھا اور اس نے سینکڑوں سامعین پر نظر ڈالی تو اس کی زبان میں گھنگنیاں پڑ گئیں۔ وہی شخص جو اُچھل اُچھل کر ہر کسی پر تنقید کر رہا تھا‘ ایک لفظ تک اس کے منہ سے نہ نکلا اور کچھ ہی دیر میں رفوچکر ہو گیا۔ اپوزیشن بالخصوص پی ٹی آئی کا بھی یہی معاملہ ہے۔ میری دُعا ہے کہ یہ جماعت اگلی مرتبہ حکومت میں آئے‘ چاہے ایک اور دھرنے کے ذریعے دھاوا بول کر یا پھر الیکشن کے ذریعے‘ ہم دیکھیں گے کہ یہ کیا گُل کھلاتی ہے۔سوال یہ ہے کہ آج اگر اس نے پاناما لیکس پر بھی دھرنے والی سیاست کرنی ہے اور اس کے کمیشن کا فیصلہ بھی شاہ محمود اور جہانگیر ترین نے ہی بالآخر اسحاق ڈار کے ساتھ بیٹھ کر کرنا ہے اور جسٹس وجیہ الدین اور چودھری سرور جیسوں کی زبان بندی رکھنی ہے تو پھر احتجاج اور دھرنوں کے نئے ڈھول بجاکر عوام کو کیوں بیوقوف بنایا جارہا ہے؟ ایک طرف موصوف احتجاج کی دھمکی دیتے ہیں‘ دوسری طرف بعد میں اپنے ہی جاگیرداروں اور سرمایہ داروں کو آگے کر کے روایتی کمیشن اور معاہدوں پر راضی بھی ہو جاتے ہیں‘ یہ آدھے تیتر‘ آدھے بٹیر والا معاملہ کب تک چلے گا؟پہلے کی بات اور تھی۔ عوام کے پاس پیپلزپارٹی اور مسلم لیگ نون کے علاوہ کوئی آپشن نہ تھی۔تحریک انصاف کی شکل میں لوگوں کو ایک نئی جماعت نظر آئی۔ اس نے تبدیلی کا نعرہ بھی لگایا۔نوجوان بالخصوص اس کے سحر میں مبتلا ہو گئے۔ لیکن یہ تبدیلی نظر بھی تو آنی چاہیے۔ کرپشن کا پیسہ بھی واپس آنا چاہیے۔ اس کے لئے کم از کم پی ٹی آئی کو سولوفلائٹ سے اجتناب کرنا چاہیے۔ ایک ایسے جوڈیشل کمیشن پر حکومت اور اپوزیشن کو متفق ہونا چاہیے جو بااختیار اور طاقتور ہو اور یکطرفہ جھکائو نہ رکھے۔ احتجاج اور دھرنے کی سیاست سے گریز رکھ کر یہ کام ہو جائے تو اور کیا چاہیے؟