اسرائیلی طیارہ یا امدادی بیڑہ

معجزے اب نہیں ہوتے البتہ کرامات جاری ہیں۔ لیکن کوئی دارالافتاء ہی بتا سکے گا، کرامتیں کن لوگوں کے لیے برپا ہوتی ہیں۔ تاریخ ، قانون، سیاسیات اور مذہب کے طالب علم کے لیے کرامت کا فیصلہ کرنا مناسب نہیں۔ ہاں البتہ انفارمیشن ٹیکنالوجی کی دنیا میں کرامات کا ظہور ہوتا رہتا ہے‘ مگر مفت میں نہیں۔ مثال کے طور پہ دارالحکومت کے ہوائی اڈے پر اسرائیلی جہاز کا نزول ، قیام اور مسافرت ۔ اس خبر کا فوری نتیجہ ٹی وی سکرینوں پر دکھائی دیا۔ چیف جسٹس جناب ثاقب نثار صاحب کے احکامات کے ہاتھوں پکڑی گئی اربوں ، کھربوں روپے کی شکر چوری کے مقابلے میں اسرائیلی جہاز کی اسلام آباد آمد کی خبر ۔ اس خبر کا ایک پس منظر بھی ہے۔ جو ہم سب جانتے ہیں‘ اور وہ ہے وزیر اعظم عمران خان کے خطاب کا یہ جملہ ''یاد رکھو میرے دور میں کوئی این آر او نہیں ملے گا‘‘۔ بظاہر اس جملے کا کوئی مخاطب نہیں ہے۔ جملے میں کسی کا بھی نام نہیں لیا گیا۔ نہ حدود اربعہ اور نہ ہی حلیہ بیان ہوا۔ سب جانتے ہیں‘ پاکستان میں الیکشن کمیشن آف پاکستان نے 300 سے زائد سیاسی جماعتیں رجسٹرڈ کر رکھی ہیں۔ ان میں سے 10/12 پارٹیاں صوبائی اسمبلیوں ، قومی اسمبلی اور سینیٹ میں اپنا اپنا وجود رکھتی ہیں۔ اب دلچسپ ترین بات دیکھ لیجئے کہ وزیر اعظم کے اس جملے کے جواب میں 300 میں سے صرف تین جماعتیں از خود بول اٹھیں ۔ پہلی الیکشن 2018ء میں دائمی اقتدار سے محروم شدہ مذہب کے نام پر سیاست کرنے والی کے پی اور بلوچستان کے سرحدی علاقوں تک محدود جماعت ۔ دوسری جمہوری پارٹی اور تیسری مفروری پارٹی ۔ یہ بھی عجیب اتفاق ہے کہ تینوں جگہ سے تین ہی آوازیں اٹھیں۔ پہلی آواز نے کہا: ہم نے این آر او نہیں مانگا ۔ دوسری کی طرف سے صدا آئی: این آر او مانگنے والوں کے نام بتائو ۔ تیسری آواز آئی: قومی ادارے احتساب کا جواب نہیں ہم سے انتقام لے رہے ہیں۔ مطلب صاف ہو گیا‘ احتساب مت کرو ۔ مک مکا کر لو۔ یعنی ونڈ کھائو اور کھنڈ کھائو۔ وزیر اعظم عمران خان کی تقریر سے پہلے، بلکہ سعودی عرب کے دورۂ ثانی سے ایک دن پہلے وزیر اعظم ہائوس کے ایک چھوٹے سے اکٹھ میں نیب قانون پر بات ہوئی ۔ کسی نے کہا: اس قانون کو ریفارم کر لینا چاہئے‘ اپوزیشن کا بھی مطالبہ ہے۔ میں نے وقفہ ڈالے بغیر عرض کیا: قوم اس مرحلے پر اسے ریفارم نہیں مک مکا سمجھے گی‘ اور جائز طور پر ۔ وہ جنہوں نے حساس ترین موضوعات پر متفقہ آئین سازی اور قانون گری کو بھی ہاتھ ڈالا‘ اگر وہ چاہتے تو قانون میں ریفارم نہ ہو جاتی ۔ وزیر اعظم کا مؤقف تب بھی یہی تھا: نو این آر او۔

قومی تاریخ کا ریکارڈ درست کرنے کے لئے آئیے آلِ شریف کے تیسرے دورِ اقتدار میں واپس چلتے ہیں۔ یہ پارلیمنٹ ہائوس کے سب سے بڑے کمیٹی روم کا اجلاس ہے ۔ کمیٹی ہے قانون و انصاف کی ۔ اس وقت کے نون لیگی وزیر قانون تھے زاہد حامد ۔ حکومتی رکن سلیم ضیاء ایڈووکیٹ ، اعتزاز احسن ، فاروق نائیک، عائشہ رضا فاروق ، سینیٹر جاوید عباسی اور بہت سے دوسرے ۔ وزارتِ قانون و انصاف کے نمائندے ، پارلیمانی امور کے کارندے‘ اور حکومتی اتحاد کی تمام پارٹیوں کے چنیدہ ارکان بھی ۔ موضوع تھا: احتساب کے قومی ادارے کی تشکیلِ نو اور احتساب کے قانون کی ترتیبِ جدید ۔ حکومت ترمیم تو کیا کرتی‘ اپوزیشن سائیڈ کی ہر تجویز پر نفی میں سر ہلا کر دلائل کے انبار لگا رہی تھی ۔ سارے دلائل کا بنیادی نکتہ یہی تھا کہ اگر اپوزیشن کی بڑی جماعت کا لیڈر چور نہیں ہے تو پھر احتساب کے ادارے اور قانون میں ترمیم کا شور کیوں بلند کر رہی ہے۔ ایوانِ بالا کی لاء اینڈ جسٹس کمیٹی کے اس اجلاس کی کارروائی اور دو عدد سابق نون لیگی وزرائے اعظم کے بیان ملا کر پڑھیں تو بات مزید کھل جائے گی۔ ایک نے کہا: یہ قانون ڈریکولا نے بنایا ۔ پی ٹی آئی کی حکومت اسے فوراً ختم کر دے ۔ کمیشن مافیا اور کرپٹ اشرافیہ کا احتساب کرنا ریاستی اداروں کا نہیں ووٹ دینے والوں کا حق ہے۔ دوسرا بولا: حکومت سے بچھڑ کر زندہ ہیں، آج بہت شرمندہ ہیں ۔ شرمندگی کی وجہ یہ بتلائی کہ ہم اپنے دورِ حکومت میں احتساب کے قانون کو ختم نہ کر سکے ۔ نیب قانون سے خوف زدہ ان دونوں شرمندہ وزرائے اعظم کا سفرِ ندامت اس سے بہت ہی زیادہ طویل ہے ۔ جس کا دونوں نے اعتراف کر لیا ۔ اس سٹریک آف شیم کا آغاز سال 1997ء سے ہوتا ہے۔ جب اپنے سیاسی مخالفین کی ساکھ مجروح کرنے اور انہیں اپاہج کر دینے کے لیے دو تہائی اکثریت والے بھاری مینڈیٹ کے نشے میں دھت آلِ شریف نے بے رحم احتساب کا نعرہ لگایا تھا۔ قانون کی دنیا میں کہتے ہیں: بندہ جھوٹ بو ل سکتا ہے‘ لیکن دستاویزات نہیں۔ ذرا خود ملاحظہ کیجئے کہ پاکستان میں احتساب کے قانون کی شروعات پر مبنی دستاویزات کیا کہتی ہیں۔

The Ehtesab Act, 1997 (No IX, 1997.)

[Islamabad 31st May, 1997]

An Act to eradicate corruption and corrupt practices from public offices.

Whereas it is expedient to provide for eradication of corruption and corrupt practices from the public offices and to provide for effective measures for prosecution and speedy disposal of cases involving corruption and corrupt practices and for matters connected therewith and incidental thereto;

It is hereby enacted as follows:

1. Short title, application and commencement. (1) This Act may be called the Ehtesab Act, 1997.

(2) It shall apply to the holders of public offices since the 6th November, 1990.

(3) It shall: come into force at once-

صرف 2سال بعد 1999ء میں آلِ شریف اسی قانون کے تحت پکڑی گئی ۔ مگر قانو ن کے خاتمے کا مطالبہ کرنے کے بجائے اسی قانون کے تحت پلی بارگین کے ذریعے سے چوری کے اثاثے نیب کو واپس کیے ۔ خود جدہ اور لندن میں چورستان آباد کر لیے ۔ چور تو چور ہی کو اذنِ رسائی دے سکتا ہے ۔ لیکن جس کی کمائی لٹ گئی اور کمائی بھی قومی شخصی نہیں ‘ وہ این آر او کیونکر دے سکتا ہے ۔

اس ہفتے اسرائیلی طیارے کے نزول کو ملک میں جاری اینٹی احتساب قومی مہم سے فوکس ہٹانے کا پہلا ہوائی بیڑہ بنایا گیا۔ ہو سکتا ہے اگلے ہفتے کسی اہم عہدے پر کوئی تازہ تعیناتی این آر او کا ثبوت بنا کر دوسرا کرپشن بچائو بیڑا مشہور کیا جائے۔ لیکن ملک کے اداروں کا بیڑہ غرق کرنے والوں کے لیے بیڑہ ہوائی ہو ، بحری ہو یا زمینی کسی کام نہیں آئے گا۔ سب جانتے ہیں پاکستان کے لیے احتساب سے اقتصاد تک شروعات و آغاز کا یہ پہلا مگر حتمی‘ آخری موقع ہے۔ ترقی پذیر قوموں کو مقابلے کی دنیا میں ایسے چانس بار بار نہیں ملتے۔ ساغر صدیقی ایسی بے رحمی پر یونہی نہیں تلملائے تھے۔

تفریق نے جادو ہی جگایا ہے بلا کا

خطرے میں ہے اے یار! چمن مہر و وفا کا

توہین ہے درویش کا اس شہر میں جِینا

ہو فاقہ کشی نام جہاں صبر و رضا کا

اب تک کا تفکرّ غمِ تقدیر کا چارہ

سینے میں پتہ رکھتے ہیں جو ارض و سما کا

محفوظ رہیں میرے گلستاں کی فضائیں

ہو قتلِ گُل و لالہ تقاضا ہے صبا کا

جلتے ہوئے دیکھے وہی معصوم شگُوفے

تھا جن کو بھروسہ ترے دامن کی ہَوا کا