حضرت آدمؑ کی زمین پہ آمد

پچھلے ہفتے میں نے آدم ؑ کی زمین پہ آمد پر لکھا۔ انسانی باقیات (Fossils) کا علم بتاتا ہے کہ ایک نہیں، کئی اقسام کے انسان اس زمین پہ آباد تھے۔ یورپ کا نی اینڈرتھل آدمی (Neanderthal Man) قریب تین سے چار لاکھ سال تک کامیاب زندگی گزارتا رہا۔ اس کا قد پانچ فٹ کے قریب لیکن سر ہم سے کچھ بڑا تھا۔ قریب تیس ہزار سال قبل، جب ہماری شکل کے جدید انسان یورپ اور ایشیا سمیت دنیا بھر میں پھیل رہے تھے، نی اینڈرتھل ختم ہوتے چلے گئے۔ اس کا ایک ممکنہ سبب موجودہ انسان کی ذہنی برتری بھی ہو سکتی ہے، جس کی بنا پر نی اینڈرتھل پہ ہم حاوی ہو گئے۔ اس ناپید انسان کی باقیات اور ڈی این اے سمیت، سب شواہد مکمل صحت کے ساتھ موجود ہیں۔

نی اینڈرتھل اور دوسری انسانی نسلوں کو ہم مغرب کی سازش قرار دے ڈالتے ہیں۔ دوسری طرف مغرب کا عمومی روّیہ مذہب کا انکار ہے۔ اپنے پیغمبر حضرت عیسیٰؑ کی تضحیک وہ ہالی ووڈ کی ان گنت فلموں میں کر چکے ہیں۔ نوحؑ کے سیلاب پہ مغرب قطعاً یقین نہیں کرتا۔ مشرق کے برعکس صوفی (Saint) کو وہاں ایک بھک منگا اور نیچ انسان سمجھا جاتا ہے۔ دوسری طرف مغربی سائنسی برادری تحقیق کے معاملے میں کڑے ترین اصولوں کی پیروی کرتی اور اس ضمن میں دھوکے بازی پر ایک دوسرے کو بھی ادھیڑ ڈالتی ہے۔ مذہب اس کا مسئلہ ہی نہیں۔ حقیقت یہ ہے کہ کھلے دل سے اگر ہم غور کریں تو جدید تحقیقات اور قرآن میں درج سائنسی حقائق میں ذرّہ برابر فرق بھی موجود نہیں۔

جہاں تک ستاروں پہ کمند ڈالنے والے جدید انسان ہومو سیپین سیپین (Homo Sapien Sapien) کا تعلق ہے، اس کی تاریخ قریب دو لاکھ سال پہ مشتمل ہے۔ حیرت انگیز طور پر پہلے ڈیڑھ لاکھ سال میں دوسرے جانوروں سے تو وہ برتر نظر آتا ہے‘ لیکن ایجادات کرنے والی موجودہ انسانی ذہانت کا ایک ذرّہ بھی اس میں نظر نہیں آتا۔ پچاس ہزار سال پہلے اچانک کوئی بڑی تبدیلی رونما ہوتی ہے۔ اس کے ساتھ ہی آپ کو انسانی باقیات کے ساتھ اعلیٰ قسم کے ہتھیار، مذہبی اشیا اور زیورات ملنے لگیں گے۔ یہاں حضرت علیؓ سے منسوب بیان پہ ایک نظر ڈالیے۔ غالباً محی الدین ابنِ عربی نے اسے رقم کیا ہے۔ فرمایا: آدم سے پہلے بھی ایک آدم تھا، اس سے پہلے ایک اور آدم اور اس سے قبل ستّر ہزار آدم۔

آئیے اب میں آپ کو وہ آیات بتائوں، جن کی بنا پر پروفیسر احمد رفیق اختر نے زمین پہ آدمؑ کی آمد سے قبل غیر ذہین اور غیر جواب دہ انسانی وجود کا نتیجہ اخذ کیا۔ ھل اتیٰ علی الانسان حین من الدھر لم یکن شیئا مذکورا۔ سورہ دھر، آیت:1، پارہ 29۔ یقینا زمانے میں انسان پر ایک وقت ایسا بھی گزرا، کہ جب وہ کوئی قابلِ ذکر شے ہی نہ تھا۔ ہم جانتے ہیں کہ آدمؑ تو ایک نہایت ہی قابلِ ذکر آدمی تھے۔ فرشتوںکو علم کے میدان میں انہوں نے شکستِ فاش سے دوچار کر ڈالا تھا۔ تو یہ ناقابلِ ذکر انسان کون تھا؟ نی این ڈرتھل بھی قابلِ ذکر اور کامیاب انسان تھا۔

جہاں قرآن میں یہ لکھا ہے کہ آدم ؑ کو مٹی سے پیدا کیا گیا، وہیں یہ بھی درج ہے (مفہوم) اور ہر زندہ چیز کو ہم نے پانی سے پیدا کیا۔ ادھر سائنس یہ کہتی ہے کہ زندگی کی بنیاد بننے والے آرگینک مالیکیولز کو ایک دوسرے سے جڑنے اور مزید پیچیدہ ہو کر خلیات تشکیل دینے کے لیے پانی یا اس جیسا کوئی مائع درکار ہوتا ہے۔ 1952ء کے مشہورِ عالم Miller-Urey تجربے میں، جب لیبارٹری میں یہ شرائط پوری کی گئیں تو زندہ خلیات کی بنیاد بننے والے امائینو ایسڈ کامیابی سے وجود میں آئے تھے۔

صاحبانِ علم و دانش سے میرا سوال یہ ہے کہ آدمؑ تو آسمان سے زمین پر تشریف لائے۔ زمین پہ موجود دوسرے جانور کہاں سے؟ انہیں تو جنت سے نہیں اتارا گیا۔ کیا وہ اسی کرّہء ارض پہ پیچیدہ خلیات کے باہمی ربط کا نتیجہ نہیں؟ دوسرا سوال یہ ہے کہ دماغ کے علاوہ، جسمانی طور پر انسان اور جانوروں میں کوئی فرق بھی تو موجود نہیں۔ کیا ان کے معدے، دل، گردے، جگر اور دیگر اعضا انہی اصولوں پہ کام نہیں کرتے ، جیسا کہ انسان میں؟

اس وقت میرے ذہن میں صرف یہی آیات موجود ہیں۔ کئی اور ہیں، جنہیں اس وقت جلدی میں ڈھونڈنا ممکن نہیں۔ خلاصہ اس کا یہ ہے کہ زمین، زندگی اور کائنات کو بڑی گہرائی میں دیکھنے کی ضرورت ہے۔ قرآن کائنات پہ غور کرنے والوں کی ستائش کرتا ہے (مفہوم) اور وہ آسمانوں اور زمینوں کی پیدائش پہ غور کرتے ہیں۔ اب مجھے یہ بتائیے کہ زمین و آسمان کی پیدائش پہ غور کرنے کے لیے کیا فلکیات (Cosmology) کا بنیادی علم (Basics) سیکھنے کی ضرورت نہیں؟ کیا ارضیات (Earth Sciences) سے آشنائی کے بغیر زمین پہ غور کرنا ممکن ہے؟ کیا زمین پہ انسانی تاریخ پہ فتویٰ جاری کرنے سے پہلے باقیات (Fossils) کے علم کا کم از کم مطالعہ ضروری نہیں؟

قرآن میں لکھا ہے: زمین اور آسمان اور جوان کے درمیان موجود ہے، اس میں نشانیاں ہیں (مفہوم)۔ زمین اور آسمان اور ان کے درمیان دیکھیے تو آپ کو اوزون ملے گی، زمین کا مقناطیسی میدان اور کروڑوں سورجوں کے برابر وجود رکھنے والے بلیک ہول ملیں گے۔ ان پہ غور کرنا کیا مغرب ہی کی ذمہ داری ہے یا خدا کے آخری پیغمبرؐ پہ ایمان رکھنے والوں کو بھی دماغ پہ زور ڈالنے کی ضرورت ہے؟ کیا عقل کی بات کرنا جرم ہے؟ کیا حقیقت رائج اور مزعومہ تصورات سے مختلف نہیں ہو سکتی؟ قرآن میں سو فیصد درست لکھا ہے کہ یہ خدا کا کلام ہے لیکن ہماری سمجھ میں تو غلطی ممکن ہے۔ لطیفہ یہ ہے کہ گزشتہ کالم کے جواب میں ایک صاحب نے مجھے گالیوں بھرا پیغام ارسال کیا۔ یہ روّیہ درست نہیں۔ ہمیں کھلے ذہن کے ساتھ گہرائی میں قرآن پہ غور کرنے کی ضرورت ہے اور جدید سائنسی تحقیقات پہ نظر ڈالے بغیر یہ ممکن نہیں۔

روزنامہ دنیا ایپ انسٹال کریں