بڑا کام

میں فائنل سمیسٹر میں تھا ، جب ایک دوست کے توسط سے مبارک علی میرے پاس آیا۔ میں بے حد غیر معمولی طالبِ علم تھا اور کئی اعزازات اپنے نام کر چکا تھا۔ مبارک علی بمشکل تمام پاس ہونے والے طالبِ علموں میں سے ایک تھا۔ مجھے اس پر ترس آیا۔ وہ بے حد معمولی دماغ رکھتا تھا لیکن کوئی بڑا کام کر کے وہ غیر معمولی لوگوں میں شامل ہونے کی خواہش رکھتا تھا۔ میں نے اسے کہا کہ سب لوگ غیر معمولی ہو جاتے تو اس دنیا کا نظام کیسے چلتا۔ اینٹیں کون بناتا ، بال کون کاٹتا اور نالیاں کون صاف کرتا ۔ اس نے کہا کہ اسے کسی کام میں کوئی شرم نہیں لیکن ساتھ ہی ساتھ وہ بڑے کام بھی کرنا چاہتا ہے ۔ میں نے صاف صاف اسے بتا دیا کہ بڑے کام کرنے والا دماغ اس کے پاس ہے ہی نہیں ۔ وہ چپ کر کے وہاں سے چلا گیا۔ بعد میں ، میں نے اس کی خبر رکھی ۔وہ مشکل مضامین منتخب کرتا اور فیل ہوتا رہتا ۔بار بار کوئی نیا کام شروع کرتا اور ناکام ہوتا۔ میری تعلیم مکمل ہو گئی ۔ ایک اچھی نوکری مل گئی۔ میں نے شادی کر لی اور یوں عملی زندگی کا آغاز ہوا۔ پھر ایک دن ایک کتاب کی تقریبِ رونمائی میں شرکت کا دعوت نامہ ملا۔ سرِ ورق پہ اس کا چہرہ دیکھ کر میں ششدر رہ گیا۔ کتاب کھولی تو ایسا لگا کہ علم و حکمت کاایک خزانہ مصنف کے دماغ میں محفوظ ہے۔میں اس سے ملنے گیا اور مجھ پر جیسے حیرتوں کے پہاڑ ٹوٹ پڑے ۔ مبارک علی کا جسم وہی تھا، آواز وہی تھی لیکن اس کا دماغ بدل چکا تھا۔ یہ ایک غیر معمولی دماغ تھا۔ یہ آسمان سے زمین اور زندگی کو دیکھ رہا تھا ۔حیرت کی شدت میں ، میں اسے دیکھتا رہ گیا۔

مبارک علی نے مجھے اپنی داستان سنائی ۔ اس نے بتایا کہ وہ ایک عام سا بچہ تھا۔ اس نے ہوش سنبھالا تو دیکھا کہ گھر میں ماں نہیں ہے ، صرف باپ ہے ۔ یہ باپ اسے نہلاتا ، کھلاتا ، سکول کے لیے تیار کرتا اور سلا دیتا ۔ اس کے باپ کے دل میں کوئی بڑا زخم تھا ۔چپ چاپ وہ اپنے بیٹے کی دیکھ بھال میں لگا رہتا ۔ مبارک علی نے اسے کبھی مسکراتے نہ دیکھا۔ اسے سنبھالنے کے علاوہ اس کا باپ منہ لپیٹ کر بستر پہ پڑا رہتا ۔ ایک زندہ لاش ، جسے انتظار تھا کہ مبارک علی اپنے پائوں پر کھڑا ہو تو وہ قبر میں جا لیٹے ۔ مبارک علی کو شروع ہی سے کوئی بڑا کام کر نے کا شوق تھا لیکن اسے ہمیشہ ناکامی ہی ملتی۔

جیسے ہی مبارک علی کی تعلیم مکمل ہوئی ، اس کا باپ بسترِ مرگ پر لیٹ گیا ۔ جب اس کا آخری وقت آیا تو مبارک علی نے اس سے پوچھا کہ اس کی ماں اچھی عورت تھی یا بری ۔ اس نے کہا ،وہ تواچھی تھی لیکن تقدیر سے کون لڑ سکتا ہے ۔اس کے علاوہ اس نے ایک لفظ نہ کہا ۔ اپنے ہونٹ اس نے سی رکھے تھے ۔ کچھ ہی دیر میں وہ مر گیا ۔ مبارک علی اسے دفنا کر آیا ۔ اب اس کی کل جائیداد یہ گھر تھا، جس کا نچلا حصہ کرائے داروں کے پاس تھا۔ باپ کے بینک اکائونٹ میں آٹھ لاکھ روپے پڑے تھے ۔ اس پہ کسی قسم کی کوئی ذمہ داری نہیں تھی۔ دو تین گھرانے اسے اپنی بیٹی کارشتہ دینے کو تیار تھے۔ وہ چاہتا تو شادی کرتا اوراپنی عائلی زندگی میں مصروف ہو جاتا۔ مبارک علی یہ سب کرنا چاہتا تھا لیکن وہ بڑا کام ؟

ایک بڑا کام کر نے کی خواہش دوسری سب خواہشات پہ غالب آگئی ۔ اس نے ایک ایسا شخص ڈھونڈا جو اللہ کے نور سے دیکھتا تھا۔ مبارک علی نے اسے کہا کہ وہ کوئی بڑا کام کرنا چاہتا ہے لیکن ہمیشہ اسے ناکامی ملتی ہے ۔ اس نے کہا ، اللہ سے مدد مانگ ۔ مبارک علی نے پوچھا ، اللہ سے مدد کیسے مانگنی ہے ؟ اس نے کہا : ایسے جیسے بچّہ تکلیف میں ماں کو بلاتا ہے ۔

تقدیر نے جیسے ایک زناٹے دار تھپڑ مبارک علی کے منہ پر رسید کیا تھا۔ اس بیچارے کی ماں ہی نہیں تھی ۔ اسے اس بات کا کوئی علم نہیں تھا کہ بچّہ تکلیف میں ماں کو کیسے بلاتا ہے ۔منہ چھپا کر وہ وہاں سے چلا آیا۔

پھر اسے یاد آیا کہ اس کے گھر میں کرائے داروں کے چار چھوٹے بڑے بچّے ہیں۔ ان میں سے ایک ذہنی اور جسمانی طور پر معذور تھا۔ ماں روزانہ اسے گھر کے سامنے ایک چھوٹی سی پالکی میں بٹھا دیا کرتی اور تھوڑی تھوڑہی بعد اس کے پاس چکر لگاتی رہتی ۔ وہ وہاں گیا اور چھپ کر اسے دیکھنے لگا ۔ اس نے دیکھا کہ بچّے کو جب کوئی ضرورت ، کوئی تکلیف ہوتی اور ماں اگر پاس نہ ہوتی تو منہ سے وہ ایک آواز نکالتا ۔ وہ زور سے ''آئو‘‘ کہتا ۔ ماں جہاں کہیں ہوتی ، بھاگتی ہوئی اس کے پاس پہنچتی ۔ اگر وہ دوسرے بچوں کے ساتھ مصروف ہوتی تو بھی انہیں چھوڑ کر اس کے پاس آتی ۔ اسے یہ بچّہ دوسرے بچّوں سے زیادہ عزیز تھا ۔اس لیے کہ اس بچّے کو ماں کی زیادہ ضرورت تھی ۔ مبارک علی کو لگا کہ وہ بھی ایک معذور بچّہ ہے ، جو ذہنی طور پر دوسروں سے پیچھے رہ گیا ہے ۔ ہمیشہ ناکامی جس کا مقدر ہوتی ہے ۔

وہ اپنے کمرے میں گیا ۔ آنکھیں بند کر کے اس نے آواز لگائی '' آئو ‘‘۔ 30سالہ ناکامیوں کے صدمے تلے دبے ہوئے مبارک علی کی آواز چیخ میں بدل گئی ۔ وہ آواز لگا تا رہا۔ دفعتاً معذور بچّے کی ماں بھاگتی ہوئی آئی۔وہ یہ دیکھنے آئی تھی کہ اس کے بچّے کی نقل کون اتار رہا ہے ۔ وہ رو رہی تھی کہ شاید اس کے بچّے کا مذاق اڑایاجا رہا ہے لیکن پھر اس نے مبارک علی کو روتے ہوئے دیکھا تو اسے اندازہ ہوا کہ وہ کسی تکلیف میں ہے ۔ اس نے پوچھا: تیری ماں کہاں ہے ۔ مبارک علی نے کہا ، میری ماں تیس سال پہلے گم گئی تھی ۔ مبارک علی اور اس عورت کی عمر میں زیادہ فرق نہیں تھا لیکن اس دن سے اس نے مبارک علی کو اپنے ذہنی معذور بچّے کی سی اہمیت دینا شروع کر دی ۔ مبارک علی کو محسوس ہوا کہ زندگی میں پہلی بار ماں کا سایہ اس پہ پڑا ہے ۔

اگر وہ مطمئن ہو جاتا تو شاید یہ کہانی یہیں ختم ہو جاتی لیکن اسے یاد آیا کہ اسے ایک بڑا کام کرنا ہے ۔ مبارک علی نے اس عورت کو کہا کہ اب اگر وہ آواز دے بھی تو وہ اس کے پاس نہ آئے۔ وہ تو خدا کو پکار رہا ہے ۔ اس نے پھر آواز لگانی شروع کی ۔''آئو، آئو، آئو‘‘ وہ اسے پکارتا رہا ؛ حتیٰ کہ اس کی پکار قبول ہوئی۔ آہستہ آہستہ اس کا ذہن بڑھنے لگا ۔ پھر یہ ذہن غیر معمولی ہو گیا ۔

میں نے مبارک علی سے پوچھا ۔ کیا اس نے کوئی وظائف پڑھے؟ اس نے کہا ، ْصرف علم میں اضافے کی وہ دعائیں ، جو سب کو معلوم ہیں ۔میں وہاں سے چلا آیا لیکن اس کے بارے میں سوچتا رہا۔ مجھے ایسا لگا کہ اصل بڑا کام کتاب لکھنا نہیں ، بلکہ وہ آواز لگانا تھا ، جو مبارک علی نے لگائی ۔ اسی لیے ناکامیوں اور صدمات سے اسے گزارا جا رہا تھا ۔

روزنامہ دنیا ایپ انسٹال کریں