اسٹاک ایکسچینج میں تیزی، انڈیکس 46 پوائنٹس بڑھ گیا
کراچی(بزنس رپورٹر)اسٹاک مارکیٹ میں منگل کو تیزی رہی۔ ٹریڈنگ کا آغاز و اختتام مثبت زون میں ہوا،ہنڈرڈ انڈیکس میں ٹریڈنگ کی شروعات 238 پوائنٹس کے اضافے سے 1 لاکھ 18 ہزار 200کی سطح سے ہوئی۔
ایک موقع پر انڈیکس 800سے زائد پوائنٹس بڑھ کر 1 لاکھ 19 ہزار217 پوائنٹس کی حد تک ٹریڈ ہوا۔ اسٹاک ایکسچینج میں سرمایہ کاروں کا اعتماد بحال رہا جس کے سبب بلوچپ کمپنیوں میں سیمنٹ ، آئل اینڈ گیس ،انرجی، آٹو اور فارما کے شیئرز میں کاروبارکارجحان سب سے زیادہ رہا۔ کاروبار کے اختتام پر کے ایس ای 100انڈیکس 46.97 پوائنٹس بڑھ کر 1 لاکھ 18 ہزار 430 پوائنٹس کی نفسیاتی حد پر ہوا جو تاریخی لحاظ سے اب تک کی دوسری بڑی سطح ہے ۔اسی طرح کے ایس ای 30 انڈیکس 8 پوائنٹس بڑھ کر 36430.19 پوائنٹس پر بند ہوا، مجموعی طور پر 448 کمپنیوں کے حصص کاکاروبار ہوا جس میں سے 214 کمپنیوں کے حصص میں اضافہ ، 193 میں کمی اور 41 میں استحکام رہا۔گزشتہ روز 74 کروڑ سے زائد مالیت کے حصص کا کاروباری حجم 30 ارب 51 کروڑ روپے سے زائد رہا۔
