البرکہ بینک کا اسپورٹس گڈز پروڈکٹ ویبینار کا کامیاب انعقاد
سیالکوٹ(بزنس ڈیسک)البرکہ بینک (پاکستان) لمیٹڈ نے سیالکوٹ میں اسپورٹس گڈز سیکٹر کے فروغ کیلئے اپنے پہلے پروڈکٹ ویبینار کا کامیاب انعقاد کیا۔۔۔
جس میں سیالکوٹ کے 70 سے زائد معروف اسپورٹس گڈز ایکسپورٹرز اور دنیا کے 12 ممالک سے اسپورٹس گڈز امپورٹرز نے بھرپور شرکت کی۔ویبینار کی صدارت البرکہ بینک (پاکستان)لمیٹڈ کے پریذیڈنٹ عاطف حنیف نے کی جب کہ مہمان خصوصی کے طور پر اسپورٹس ایسوسی ایشن کے چیئرمین اور فارورڈ اسپورٹس کے سی ای او خواجہ مسعود اختر شریک ہوئے ۔ سیالکوٹ چیمبر کے عہدیداران، جن میں وسیم شہباز لودھی اور دیگر معزز شخصیات شامل تھیں بھی موجود تھے۔ ویبینار کا مقصد سیالکوٹ کے اسپورٹس گڈز ایکسپورٹرز کو دنیا کی نئی منڈیوں اور ممالک تک رسائی دینا اور برآمدات کو فروغ دینا تھا۔ اس اقدام سے مقامی صنعت کو تجارت کے نئے مواقع فراہم ہوں گے اور بین الاقوامی سطح پر پاکستان کے اسپورٹس گڈز کو مزید پذیرائی حاصل ہوگی۔ البرکہ بینک (پاکستان) لمیٹڈ نے اس سلسلے میں ایک خصوصی ٹریڈ فنانس پورٹل بھی بنایا ہے جس میں مختلف انڈسٹریز کے ایکسپورٹرز اور امپورٹرز کی مکمل تفصیل موجود ہے ۔ اس پورٹل کے ذریعے ایکسپورٹرز اور امپورٹرز کو بی ٹو بی کنکٹوٹی کی سہولت فراہم کی گئی ہے، جس سے انہیں عالمی منڈیوں تک براہِ راست رسائی اور نئے کاروباری روابط قائم کرنے میں مدد ملے گی۔
