بینک مکرمہ کابعد از ٹیکس منافع707ملین روپے ریکارڈ
کراچی(بزنس ڈیسک)بینک مکرمہ لمیٹڈ (بی ایم ایل)نے 30 جون 2025 کو ختم ہونے والی ششماہی مدت کے لیے 1.44 ارب روپے کا قبل از ٹیکس منافع اور 707 ملین روپے کا بعد از ٹیکس منافع رپورٹ کیا ہے ۔۔
یہ ایک دہائی سے زائد عرصے میں بینک کا پہلا منافع ہے ۔بورڈ آف ڈائریکٹرز کی جانب سے یکم اگست کو منعقدہ میٹنگ کے دوران منظور کیے گئے نتائج گزشتہ سال اسی عرصے میں رپورٹ کیے گئے 2.44 بلین روپے کے نقصان سے بدلاؤ کی عکاسی کرتے ہیں جس کے نتیجے میں 3.88 بلین روپے کی بہتری آئی ہے ۔ فی حصص آمدنی بھی 0.11 روپے تک بہتر ہوئی۔بی ایم ایل کے چیئرمین عبداللہ ناصر عبداللہ حسین لوٹاہ نے بینک کی مضبوط کارکردگی بہتر خالص مارک اپ آمدنی، غیر فعال قرضوں کی ریکارڈ ریکوری، نمایاں طور پر بہتر ڈپازٹ مکس جس نے ڈپازٹس کی اوسط لاگت کو کم کیا اور اس عرصے کے دوران غیر معمولی ٹریژری فوائد حاصل کیے ہیں۔ یہ نتائج بی ایم ایل کی کامیاب حکمت عملی کی عکاسی کرتے ہیں۔انہوں نے مزید زور دیا کہ یہ سنگ میل ان کی ٹیموں کی سرشار کاوشوں کا ثبوت ہے جو بینک کے مستقبل اور پاکستان کی معاشی بحالی پر اعتماد کا اظہار کرتا ہے ۔ششماہی کی مدت کے بعد، بینک نے 12 ارب روپے میں اسٹریٹجک اثاثہ کی کامیاب فروخت اور حصص کیپٹل کے مقابلے میں پیشگی کے طور پر اپنے اسپانسر سے 5 ارب روپے کے انجیکشن کے ساتھ اپنی پوزیشن کو مضبوط کیا۔ اسلام آباد ہائی کورٹ کے سامنے انتظامات کی اسکیم اپنے آخری مراحل میں ہے ، جس کی تکمیل کے بعد بینک کے کیپٹل بیس میں مزید اضافہ متوقع ہے ۔صدر اور سی ای او جواد ماجد خان نے کہا کہ یہ تاریخی نتائج بینک کے لیے ایک اہم لمحہ کی نشاندہی کرتے ہیں جوبی ایم ایل کی انتظامیہ اور ملازمین کی انتھک کوششوں کو اجاگر کرتے ہیں۔
