نوجوانوں میں کاروباری صلاحیتوں کو فروغ دینا ناگزیر :ماہرین
فیصل آباد(سٹاف رپورٹر)بڑھتی ہوئی بے روزگاری اور برین ڈرین کی صورتحال کے پیش نظر نوجوانوں میں کاروباری صلاحیتوں کو فروغ دینا ناگزیر ہے۔۔۔
تاکہ تربیت یافتہ نوجوان نسل ان صلاحیتوں کو بروئے کار لاتے ہوئے بہترین آمدن حاصل کر سکیں۔ ان خیالات کا اظہار ماہرین نے تحقیق، ہنر اور انٹرپرینیورشپ کا معاشرتی فلاح و بہبود میں کردار کے موضوع پر منعقدہ ایک روزہ ورکشاپ سے خطاب کرتے ہوئے کیا۔ ورکشاپ کا اہتمام پاک کوریا نیوٹریشن سنٹر،فیکلٹی آف فوڈ نیوٹریشن اینڈ ہوم سائنسز نے بزنس انکیوبیشن سینٹر اور نیشنل انکوبیشن سنٹر کے اشتراک سے کیا تھا۔ شرکاسے خطاب کرتے ہوئے ڈین فوڈ سائنسز ڈاکٹر عمران پاشا نے کہا کہ ترقی یافتہ ممالک بھی عوامی سطح پر سو فیصد ملازمتیں فراہم نہیں کر سکتے اس کے لئے وہ نوجوان نسل میں کاروباری صلاحیتوں کو فروغ دیتے ہوئے انٹرپرینیورشپ کی طرف راغب کرتے ہیں۔ انہوں نے محققین کو اپنے کام کے وسیع تر سماجی ترقی کے ثمرات پر غور کرنے کی ضرورت پر زور دیا۔ انہوں نے کہا کہ محققین کے طور پر ہماری ذمہ داری ہے کہ ہم اس بات کو یقینی بنائیں کہ ہمارے تحقیقی امور سے معاشرے میں خوشحالی کی نئی راہیں مرتب ہوں۔ ڈائریکٹر بزنس انکوبیشن سنٹر ڈاکٹر افتخار احمد نے سٹارٹ اپس کو سپورٹ کرنے میں بزنس انکوبیشن سنٹر کے کردار پر روشنی ڈالی ۔
