لوگوں کے مسائل ترجیحی بنیادوں پر حل کر رہے :عبداللہ احمد
چنیوٹ(ڈسٹرکٹ رپورٹر )ڈی پی او چنیوٹ عبداللہ احمد نے کہا ہے کہ وزیر اعلیٰ مریم نواز کے ویژن کے مطابق پبلک سروس ڈلیوری میں بہتری کیلئے تمام ممکن اقدامات کئے جارہے ہیں اور لوگوں کے مسائل ترجیحی بنیادوں پر حل کئے جار ہے ہیں۔
ان خیالات کا اظہار انہوں نے گزشتہ روز روزانہ کی بنیاد پر اوپن ڈور پالیسی کے تحت شہریوں کے مسائل سنتے ہوئے گفتگو کے دوران کیا۔اس موقع پر انہوں نے شہریوں کی درخواستیں متعلقہ افسران کو مارک کرکے مختص کردہ ٹائم میں داد رسی یقینی بنانے کی ہدایت جاری کر دی جبکہ انہوں نے کمپلینٹ سیل افسران کو درخواستوں کا فالو اپ لے کر رپورٹ پیش کرنے کی بھی ہدایت کی۔ اس موقع پر گفتگو میں ڈی پی او چنیوٹ نے مزید کہا ضلع بھر کے تمام تھانوں میں جدید ٹیکنالوجی کو بروئے کارلاتے ہوئے شہریوں کی سہولت کیلئے اقدامات کئے گئے ہیں، فیلڈ افسران کو ہدایات جاری کی گئی ہیں کہ کسی بھی مسئلہ کی صورت میں آنے والے شہریوں کیساتھ اچھے اخلاق سے پیش آکر ان کا مسئلہ جلد از جلد حل کیا جائے اور بلاوجہ انتظار نہ کروایا جائے ۔دفاتر،تھانہ جات میں کسی بھی شہری کی تضحیک ہرگز برداشت نہیں کی جائے گی۔کسی بھی وجہ سے شہریوں کا تھانہ جات میں کوئی مسئلہ حل نہیں ہوتا تو شہری بلاجھجھک میرے دفتر تشریف لائیں ،انکے مسائل کا حل یقینی بنایا جائے گا ۔ ڈسٹرکٹ پولیس آفیسر چنیوٹ نے مزید کہا کہ جرائم کے خاتمہ کیلئے عوامی تعاون بے حد ضروری ہے ،جرائم کے خاتمہ کیلئے پولیس کے ساتھ تعاون کریں اور اپنے اردگرد ہونے والے جرائم کی نشاندہی کریں تاکہ بروقت کارروائی عمل میں لائی جا سکے اور جرائم پیشہ عناصر کو کیفرکردار تک پہنچایا جا سکے ۔
