×

فیصل آباد

پتنگ بازی پر پابندی کے باوجود سرگرمیاں جاری

بند کریں

بلند عمارتوں پر منچلوں کی جانب سے مقابلے منعقد کرنے کی اطلاعات، بعض اہلکار نذرانے وصول کر نے میں بھی مصروف ،بلاامتیاز سخت قانونی کارروائی کا مطالبہ

فیصل آباد (عبدالباسط سے )فیصل آباد میں جمعہ کی مقامی تعطیل کے دوران پتنگ بازوں نے مبینہ طور پر پابندی کو نظرانداز کرتے ہوئے دن بھر پتنگ بازی کی۔ شہر کے مختلف علاقوں میں رنگ برنگی پتنگیں آسمان پر اڑتی دکھائی دیتی رہیں، جبکہ منچلوں کی جانب سے بلند عمارتوں پر چڑھ کر پتنگ بازی کرنے اور مقابلے منعقد کرنے کی اطلاعات بھی سامنے آئیں۔ شہریوں کا کہنا ہے کہ پتنگ بازی کے دوران عمارتوں سے گرنے ، ڈور پھرنے اور دیگر حادثات کے نتیجے میں قیمتی جانوں کے ضیاع اور شہریوں کے زخمی ہونے کے واقعات کے باوجود اس خطرناک سرگرمی کی روک تھام کے لیے مؤثر اقدامات نظر نہیں آ رہے ۔ذرائع کے مطابق فیصل آباد میں پتنگ بازی اور پتنگ سازی کے غیر قانونی کاروبار میں ملوث عناصر کے خلاف کارروائیوں پر سوالات اٹھائے جا رہے ہیں۔ گزشتہ روز بھی مقامی تعطیل کے موقع پر متعدد منچلے اور پتنگ باز بلند عمارتوں پر چڑھ کر پتنگ بازی میں مصروف دکھائی دیے ۔ پابندی کے باوجود دن بھر پتنگیں اڑائے جانے سے حکومتی احکامات پر عمل درآمد کے حوالے سے تشویش پائی جاتی ہے ۔پولیس حکام کی جانب سے پتنگ بازی پر پابندی پر سختی سے عمل درآمد یقینی بنانے کے احکامات جاری کیے جاتے ہیں، تاہم شہریوں کا الزام ہے کہ ان احکامات پر مؤثر عمل درآمد نہیں ہو رہا۔

پتنگ بازی کے دوران ڈور پھرنے ، بلند عمارتوں سے گرنے اور دیگر حادثات کے باعث شہریوں کی ہلاکتوں اور زخمی ہونے کے واقعات سامنے آتے رہتے ہیں، لیکن اس خطرناک سرگرمی کی روک تھام کے لیے مزید مؤثر اقدامات کی ضرورت محسوس کی جا رہی ہے ۔ذرائع نے الزام عائد کیا ہے کہ پتنگ بازوں کے خلاف سخت قانونی کارروائی کرنے کے بجائے چکرکے ملزمان کو موقع پر ہی چھوڑ دیتے ہیں۔ تاہم ان الزامات کی آزادانہ تصدیق نہیں ہو سکی۔ شہریوں کے مطابق ایسی مبینہ غفلت کے باعث پتنگ بازی کی سرگرمیوں میں کمی آنے کے بجائے دوبارہ اضافہ ہوتا دکھائی دے رہا ہے ۔شہریوں کا کہنا ہے کہ تھانہ فیکٹری ایریا کے علاقے میں چند سال قبل ڈور پھرنے سے آصف نامی نوجوان کے جاں بحق ہونے کے واقعے کے بعد کئی سال تک پتنگ بازی کی سرگرمیاں بڑی حد تک ختم ہو گئی تھیں، تاہم اب وقت گزرنے کے ساتھ یہ سرگرمیاں دوبارہ بڑھتی دکھائی دے رہی ہیں۔شہریوں نے پولیس کے اعلیٰ حکام سے مطالبہ کیا ہے کہ پتنگ بازی کرنے ، پتنگ سازی اور اس سے متعلق ممنوعہ سامان کی خرید و فروخت میں ملوث عناصر کے خلاف بلاامتیاز سخت قانونی کارروائی کی جائے اور پابندی پر مؤثر عمل درآمد یقینی بنایا جائے ، تاکہ انسانی جانوں کو لاحق خطرات کا سدباب کیا جا سکے۔

روزنامہ دنیا ایپ انسٹال کریں