سیاسی عدم استحکام کی فضا کو ختم کرنا ہو گا:ڈاکٹر طارق
گجرات(سٹی رپورٹر )جماعت اسلامی پنجاب کے امیرڈاکٹرطارق سلیم نے صحافیوں سے گفتگوکرتے ہوئے کہاکہ پائیدار ترقی اور عوامی مشکلات کے خاتمے کے لئے سیاسی عدم استحکام کی فضا کو ختم کرنا ہو گا،باہمی تعاون اور سیاسی بصیرت سے ہی مسائل کو حل کیا جا سکتا ہے۔
بد قسمتی سے موجودہ حکمرانوں نے ملک و قوم کو بند گلی کی طرف دھکیل دیا ہے ،المیہ یہ ہے کہ فارم 47والے پاکستان کودرپیش مشکلات میں اضافہ کر رہے ہیں،یوں محسوس ہوتا ہے کہ جیسے کسی کو بھی عوام کے مسائل کے حل سے کوئی غرض نہیں اور نہ ہی قومی سلامتی اور عزت و وقار کی قدر ہے ،ملکی حالات دن بدن ابتر ہوتے چلے جا رہے ہیں۔ڈاکٹرطارق نے کہاکہ ملک قرضوں میں جکڑ دیا گیا ہے صنعتیں بند پڑی ہیں اور بے روزگاری میں بے تحاشا اضافہ ہوا ہے ، حکمران رائٹ سائزنگ اور ڈاون سائزنگ کے نام پر لوگوں کو بے روزگار کرنا بند کریں اداروں کو دیانت دار اور باصلاحیت مینجمنٹ دیں،اپنی عیاشیاں اور غیر ترقیاتی اخراجات ختم کریں، بڑی گاڑیوں مفت پٹرول مفت بجلی اور دیگر مراعات سے دستبردار ہو جائیں تو حالات سدھر جائیں گے ۔ ڈاکٹرطارق سلیم نے کہا کہ ملک پر کرپٹ افراد کا ٹولہ ہے جو فارم 47کے ذریعے مسلط کر دیا گیا ہے ۔ انہوں نے اداروں کو تباہ کیا اور کرپشن کرکے بیرون ملک اپنے اثاثہ بنائے ، قوم کو درپیش مسائل کے حل سے انہیں کوئی غرض نہیں۔
