سیالکوٹ:50کروڑ روپے کی 8ترقیاتی سکیموں کی منظوری
سیالکوٹ (نمائندہ دنیا ،ڈسٹرکٹ رپورٹر)ڈپٹی کمشنر صبا اصغر علی کی زیر صدارت ڈسٹرکٹ ڈویلپمنٹ کمیٹی کے اجلاس میں 50 کروڑ روپے سے زائد کی ترقیاتی سکیموں کی منظوری دیدی گئی۔
اجلاس میں سالانہ ترقیاتی پروگرام 2025-2026 کے تحت مختلف محکموں کی پیش کردہ ترقیاتی سکیموں کا تفصیلی جائزہ لیا گیا۔ اجلاس میں مختلف محکمانہ افسر وں ، پلاننگ اینڈ ڈویلپمنٹ، فنانس، لوکل گورنمنٹ اور ہائی ویز ڈیپارٹمنٹ کے نمائندگان نے شرکت کی۔اجلاس میں کل 13 ترقیاتی سکیمیں زیرِ غور آئیں جن میں سے 8 سکیموں کو منظور کر لیا گیا۔ ان میں لوکل گورنمنٹ اینڈ کمیونٹی ڈویلپمنٹ ڈیپارٹمنٹ کی 7 اور ہائی ڈویژن سیالکوٹ کی ایک سکیم شامل ہے ۔منظور کی گئی سکیموں پر تخمینہ لاگت 50 کروڑ 77 لاکھ روپے لگایا گیا ہے جن کا مقصد شہری و دیہی علاقوں میں بنیادی سہولیات کی بہتری، سڑکوں کی تعمیر و مرمت، نکاسی آب اور کمیونٹی ڈویلپمنٹ کے دیگر اہم منصوبوں کی تکمیل ہے ۔ڈپٹی کمشنر صبا اصغر علی نے اس موقع پر کہا کہ ترقیاتی منصوبوں میں معیار اور شفافیت کو ہر صورت یقینی بنایا جائے گا۔ متعلقہ افسر وں کو ہدایت کی گئی کہ وہ منصوبوں پر بروقت عملدرآمد کو یقینی بنائیں تاکہ عوام ان منصوبوں کے ثمرات جلد از جلد حاصل کر سکیں۔
