ڈاکوؤں سے 25مقابلے ،ایک ہلاک،35زخمی
کراچی (اسٹاف رپورٹر) شہر میں انسداد جرائم کے دوران ڈاکوؤں سے ضلعی پولیس کے 25 مقابلے ہوئے ، فائرنگ کے تبادلے میں 1 ڈاکو کو ہلاک جبکہ 35 زخمی ڈاکوؤں سمیت متعدد کو رنگے ہاتھوں گرفتارکیا گیا۔
گرفتار ملزمان سے مختلف اقسام کا غیر قانونی اسلحہ بشمول 35 پستول، 1 منی کلاشنکوف اور 18 موٹر سائیکلیں برآمد کی گئیں، جبکہ برآمدہ اسلحہ کو فارنزک کیلئے روانہ کر دیا گیا ہے ۔ پولیس نے گزشتہ ہفتے کے دوران کراچی کے ایسٹ، ویسٹ اور ساؤتھ زونز میں چھاپوں کے دوران مجموعی طور پر 840 سے زائد ملزمان کو گرفتار کیا۔ پولیس کی جانب سے منشیات کیخلاف جاری مہم کے دوران مختلف علاقوں سے لاکھوں روپے مالیت کی 44 کلو 59 گرام چرس، ہیروئن اور آئس/کرسٹل برآمد کی گئی۔ گرفتار اسٹریٹ کرمنلز سے شہریوں سے لوٹ مار اور دیگر وارداتوں میں استعمال شدہ 146 سے زائد مختلف اقسام کا غیر قانونی اسلحہ و ایمونیشن تحویل میں لیا گیا۔ کراچی پولیس نے مختلف علاقوں میں کارروائیاں کرتے ہوئے مجموعی طور پر چھینی و چوری شدہ 74 موٹرسائیکلیں اور 13 گاڑیاں تحویل میں لے لیں۔ پولیس کی جانب سے جرائم کے خاتمے ، امن وامان کی بحالی اور عوام کے تحفظ کیلئے کئے جانے والے اقدامات جاری رہیں گے۔
