چڑیا گھر میں نئے مہمانوں کی آمد، شیرنی کے 3بچوں کا جنم
کراچی (اسٹاف رپورٹر)کراچی چڑیا گھر میں افریقی شیر کے جوڑے نے تین عدد بچوں کو جنم دیا ، نئے مہمانوں کی آمد سے چڑیا گھر کی رونقوں میں اضافہ ہوگا۔۔
تینوں بچے اور شیرنی صحتمند ہیں، تینوں بچوں کو حفاظتی طور پر مخصوص پنجرے میں رکھا گیا ہے ،8ہفتوں کے بعد تینوں بچوں کو عام پنجروں میں شفٹ کردیا جائے گا تاکہ چڑیا گھر آنے والے شہری انہیں قریب سے دیکھ سکیں۔ میئر کراچی بیرسٹر مرتضیٰ وہاب نے اس عزم کا اعادہ کیا ہے کہ کراچی چڑیا گھر کو مزید بہتر بنایا جائے گا۔نئے جانوروں کا اضافہ کیا جائے گا، تفریحی سہولتیں بڑھائی جائیں گی۔ گزشتہ دنوں چڑیا گھر میں جدید فن لینڈ اور الیکٹرک ریل کا اضافہ کیا گیا ہے ، تاریخی مغل گارڈن کی تزئین و آرائش کی گئی ہے ۔ انہوں نے کہا کہ ہماری کوشش ہے کہ کراچی چڑیا گھر میں ہر عمر کے افراد کیلئے تفریحی سہولتیں مہیا کی جائیں تاکہ پورا خاندان یہاں آکر لطف اندوز ہوسکے ۔میئر نے کہا کہ جانوروں اور پرندوں پر تحقیق کرنے والے محققین اور طالبعلموں کیلئے بھی یہاں خصوصی سہولت مہیا کرنے کیلئے اقدامات کئے جارہے ہیں تاکہ وہ بہتر انداز میں مشاہدات اور تجربات کرسکیں۔ میئر نے سینئر ڈائریکٹر ریکریشن اقبال نواز کو ہدایت کی کہ وہ شیرنی کے بچوں کا خاص خیال رکھیں۔
