گورنرکی ہدایت پر اومان کے 54ویں قومی دن کو بھرپور انداز میں منایاگیا
کراچی(این این آئی)گورنر سندھ کامران خان ٹیسوری کی ہدایت پر اومان کے 54ویں قومی دن کو بھرپور انداز میں منایا گیا، گورنر ہاؤس سے متصل پریس کلب چوک پر پاک اومان کا پرچم لہرایا گیا۔۔۔
پریس کلب چوک کے اطراف کو مختلف لائٹوں سے سجایا گیا اور شاندار آتش بازی کا مظاہرہ کیا گیا۔ گورنر سندھ نے اومان کے قومی دن کے موقع پر اومان کے سفیر و قونصل جنرل اور عوام کو مبارکباد دی ہے اور کہا ہے کہ پاکستان اور اومان کے درمیان گہرا رشتہ ہے ، جس کی جڑیں باہمی احترام ، مشترکہ اقدار اور پائیدار دوستی پر مشتمل ہیں، اور دونوں ممالک ایک دوسرے کے دکھ درد و خوشی میں برابر کے شریک ہیں۔یاد رہے کہ گزشتہ روز گورنر سندھ سے اومان کے قونصل جنرل انجینئر سمیع عبداللہ الخنجاری نے سرمایہ کاروں کے 6 رکنی وفد کے ہمراہ گورنر ہاؤس میں ملاقات کی۔ ملاقات میں دوطرفہ تعلقات ، سرمایہ کاری سمیت دیگر امور پر تبادلہ خیال کیا گیا۔
