کسٹم نے 4 ارب 44 کروڑ مالیت کی ممنوعہ اور اسمگل شدہ اشیا نذر آتش کر دیں
کراچی(اسٹاف رپورٹر)پاکستان کسٹمز انفورسمنٹ کراچی نے 4 ارب 44 کروڑ مالیت کی ضبط شدہ ممنوعہ اور اسمگل شدہ اشیاء تلف کردیں۔ پاکستان کسٹمز انفورسمنٹ کراچی کے تحت اشیاء کو تلف/نذر آتش کرنے کی تقریب منعقد ہوئی۔۔
جس میں رینجرز اور پولیس افسران نے شرکت کی۔ اس موقع پر 2 ارب 63 کروڑ سے زائد مالیت کی 5 ہزار کلو گرام منشیات نذر آتش کی گئی۔47 کروڑ 70 لاکھ روپے مالیت کی غیر ملکی شراب کی 26 ہزار بوتلیں، 44 کروڑ 6 لاکھ 70 ہزار روپے مالیت کی 5 لاکھ کلوگرام مضرِ صحت چھالیہ بھی تلف کردی گئیں جبکہ 33 کروڑ 28 لاکھ 90 ہزار روپے مالیت کا 27 ہزار کلوگرام انڈین گٹکا نذر آتش کیا گیا۔چار کروڑ 6 لاکھ 20 ہزار روپے مالیت کی 47 ہزار 460 کلو گرام مضرِ صحت میٹھی چھالیہ بھی نذر آتش کی گئی۔ 3کروڑ 92 لاکھ روپے مالیت کا 32 ہزار کلوگرام چائنیز سالٹ اجینوموتو نذر آتش کیا گیا ۔ 36 کروڑ 28 لاکھ 70 ہزار روپے مالیت کے 1 لاکھ 1 ہزار کارٹن غیر ملکی سگریٹ جلائے گئے ۔ 92 لاکھ 40 ہزار روپے مالیت کی 1870 کلوگرام نسوار تلف کردی گئی، 61 لاکھ 40 ہزار روپے مالیت کا 1400 کلوگرام شیشہ فلیور بھی تلف کردی گئی۔57 لاکھ 70 ہزار مالیت کی ممنوعہ زائد المیعاد ادویات کو بھی تلف کردیا گیا، 20 کروڑ 68 لاکھ 70 ہزار روپے مالیت کی کاسمیٹکس اور منیاری کا سامان تلف کیا گیا، 20 لاکھ کی زائد المیعاد اشیاء خور و نوش بھی تلف کی گئیں۔ کلکٹر کسٹمز انفورسمنٹ معین الدین وانی نے کہا کہ اسمگلرزکی سرکوبی کرتے رہیں گے۔
