سندھ سالڈ ویسٹ مینجمنٹ بورڈ میں عیدالفطر کے سلسلے میں ایمرجنسی نافذ
کراچی (این این آئی)منیجنگ ڈائریکٹر سندھ سالڈ ویسٹ مینجمنٹ بورڈطارق علی نظامانی نے عیدالفطر کے سلسلے میں ایمرجنسی نافذ کرتے ہوئے ہدایت کی کہ صفائی ستھرائی کے انتظامات مزید بہتر بنائے جائیں۔
انہوں نے کہا کہ عید گاہوں، مساجد، امام بارگاہوں، پارکس،فوڈ اسٹریٹ اورقبرستانوں کے اطراف صفائی کے خصوصی انتظامات کئے جائیں۔انہوں نے عیدالفطر کے سلسلے میں منعقد اجلاس کی صدارت کرتے ہوئے کہا کہ شہریوں کو بالخصوص نمازیوں کوکو ئی شکایت کا موقع نہ دیں، عیدالفطر کے دوران کچرا معمول کے مطابق اٹھایا جائے گا، انہوں نے جی ٹی ایس اور لینڈ فل سائٹ پرآپریشن بھی بلا تعطل جاری رکھنے اور عوامی شکایات کا ازالہ بروقت یقینی بنانے کی ہدایت کی۔انہوں نے کہا کہ چاند رات کو دیر تک آپریشن جاری رکھ کر تمام علاقوں سے کچرا اٹھانے کا کام یقینی بنائیں۔ اس کے علاوہ انہوں نے کہا کہ نجی کمپنیز عیدالفطر کی چھٹیوں کے دوران سوفیصدکام یقینی بنائیں اور اضافی مشینری ار لیبر کا انتظام رکھیں۔ اس موقع پر افسران نے اجلاس میں بتایا کہ سینیٹری ورکرز اور دیگر عملے کی خصوصی ٹیمیں تشکیل دے دی گئی ہیں جو عیدالفطرکی چھٹیوں کے دوران شفٹوں میں صفائی کے امور انجام دیں گی۔ عوام سے بھی اپیل ہے کہ وہ اپنی ذمہ داری نبھاتے ہوئے سوکھا اور گیلا کچرا الگ الگ تھیلیوں میں بند کرکے کچرے دان میں رکھیں۔
